2013 ий Марий Элыште Чавайн идалык семын палемдалтын. Вет 6 октябрьыште Марий сылнымутлан тӱҥалтышым пыштыше Сергей Чавайнын шочмыжлан 125 ий темеш. Тиде кечын шым шагат эрдене Йошкар-Оласе С.Г.Чавайнын памятникше воктеч кушталаш йӧратыше-влакын «Айвика» клубышт гыч 25 еҥ кужу корныш лектын. Нуно 125 меҥгым Чавайнур марте куржыт.

• С.Г.Чавайнын шочмыжлан 125 ий (фото, видео)

Ты памятник воктекак 9 шагатлан писатель, мер пашаеҥ да моло аланыште тыршыше чолга еҥ-влак, тыгак Чавайнын тукымжо чумыргеныт да пеледышым пыштеныт. Тушко чыла кумылан ушнен кертыныт.

Вара калык, погынен, Морко велыш кудалын. Тушто 12 шагатлан Чавайнур тураштырак, Чавайн отышто 30 наре тумо ден пистым шындаш тӱҥалыт. Илен-толын, тудо гӱжлышӧ отышко савырнышаш.

Кас велеш Чавайнурышто Сергей Чавайным шарныме пайрем эрта.

А 3 октябрьыште Т.Евсеев лӱмеш национальный тоштерыште «Взгляд сквозь призму столетий» выставке почылто. Тоштерыште Сергей Чавайн дене кылдалтше 167 экспонат аралалтеш. А выставкышке 34-м лукмо. Ятырым журналист Анатолий Титов погаш полшен, тышке тудын фотографийже-влак пуреныт. Выставке Морко да моло районысо школлашке лек тын коштшаш.

Автор: Эльвира Куклина.
Выставке нерген кумданрак: http://www.fumus.ru