«Коват гай улат» изинекак тушкалтен пуымо ойым моткоч кÿкшын аклем

7 августышто Москвина Антонина Степановна 80 ияш лÿмгечыжым палемдыш.

Антонина Степановна Кужэҥер район Чодраялыште шочын-кушкын. Йоча пагытше сар жапыште эртен. Аваже тудым 50 ияш ыштен. Тыгодым ачажлан 67 ий лийын. Ешыште 17-ше йоча шочын. Тоню (тудым кызытат тыге ойлат)12 ияшак тулыкеш кодын. Максым изаж ден Таисия еҥгаже шÿжарышыштым, Галя ден Тонюм, шкешт деке ашнаш налыныт.

Илыш нелылан кöра Тоню шым классым гына тунем пытара. 8-ше классышкат пура, но тиде пагатлан изи аза дене шкет кодшо еҥгаже (изаже армийыште служитлен) тунемаш 150 теҥгем тÿлен кертын огыл. Тоню почтальонлан ышташ тÿҥалеш. Кок ий йÿштыжö, шокшыжо, йÿржö, лумжо, вÿдшоржо пошкудо яллашке газетым, журналым, серышым нумалеш. Тыгодым пасушко изи азам – еҥгажын эргыжым – сакалтен тÿредаш коштеш. Аза шепкаште мален кия, а Тоню пашам ышта.

Вара фермыш дояркылан пура, тыге 28 ий тиде пашам шукта. Тÿрыс паша стажше 38 ий.

Шке ялже гычак рвезе Аркадий Харитонович Москвинлан, кум ий келшымеке, марлан кая. Кузе таче Антонина Степановна шарналта: «Эр марте шинчена ыле, вара мый фермыш, а тудо пасушко ошкылынна». Пелашыже ÿмыржö мучко тратористлан пашам ыштен.

Ешыште кандаш йоча шочын. Кудытшо йолÿмбкаке шогалыныт. Кызыт Антонина Степановнан 16 уныкаже да 19 уныкан уныкаже уло. Чаманен каласаш логалеш, кум эргыже да кок уныкаже ÿмыр лугыч лийыныт, пелашымат поген пыштен.

Чолга ÿдырамаш «За трудовую доблесть» медаль, Ава медаль да моло знак, диплом дене палемдалтын. Паша ветеран.

Пашаче кумылан айдеме ик татат лыпланен огеш керт. Тудын эре кÿсеныштыже мундыра да спице коштын. Паша коклаште икмыняр минутлан канатлташ шичмеке, кид вигак кÿсеныш пурен. Тыге Антонина Степановна мыняр ÿстембалшовычым, ковёрым, салфеткым, пижергым, носким да молымат пидын. Кызыт книгам лудаш йöрата, почеламут-влакым воза, моткоч шуко мурым пала. Кумылжо лийме годым муралта.

Шергакан авам, ковам кугу еш шокшын-шокшын саламла.

Чот пагалыме, йöратыме авайна, ковайна, шуко-шуко ий пеленна лий! Тазалыкет пеҥгыде-пеҥгыде лийже! Тыйын ныжыл кумылет, поро мутет мемнам эреак куандарат. Шыргыжал колтет – чон кана. Мурет муралтет – кумыл ласкаҥеш. Тый улат да кече шыратен онча, тый улат да илышна пеледеш, тый улат да ме пиалан улына!

Кугу еш лÿм дене Эльвира уныкаже самлем. Да «коват гай улат» изинекак тушкалтен пуымо ойым моткоч кÿкшын аклем, тыгай таҥастарымашым чынже денак сай паша, поро койыш-шоктыш дене сулаш тыршем.

А шÿм гыч лекше шокшо салам ден поро тыланымашке ушнат ныл ÿдыржö, ныл веҥыже, ик эргыже, кок шешкыже, 16 уныкаже, нунын пелашышт-влак да 19 уныкан уныкаже.

Автор: Эльвира Куклина.
#МариАрслан #Юбилей #Бабушка #Личность