Спектакльыште – у артист-влак!

Вход на сайт

2017 ий 16 июньышто 18 шагатлан М. Шкетан лӱмеш Марий кугыжаныш драме театр Леонид Яндаковын пьесыж почеш шындыме «Йӧратымаш? Йӧратымаш! Йӧратымаш…» спектакльышке пагален ӱжеш. Тиде постановко у шӱлышым налеш.

«Кажне спектакльын – шке ӱмыржӧ. Калык погына гын, молан шындаш огыл? Теве Моссовет театр «Иисус Христос – суперзвезда» спектакльым 30 ий утла шында. 5 але 6 состав ынде вашталтын. Тиде пеш сай практике. Мемнанат улыт тыгай постановко-влак, кудыжым зритель уэш-пачаш куанен онча. Театрыштына моткоч виян, самырык артист-влак улыт. Мый шонем, йӧн улмо годым ыштыман»,
– палдарыш спектакльын режиссёржо Василий Домрачев.

«Йӧратымаш? Йӧратымаш! Йӧратымаш…» комедийын премьерыже 2002 ий 27 декабрьыште лийын. 15 ий наре жап эртен гынат, спектакльыште тарватыме проблеме шке пӱсылыкшым йомдарен огыл. Ондаксе состав гыч Лаймырын рольжым модшо РФ-н сулло, Марий Элын калык артистше-влак Иван Смирнов ден Олег Кузьминых гына кодыныт. Наставийым – Елена Мочалова ден Галина Иванова, Светланам – Наталия Алексеева ден Марина Воронцова, Чылдемырым – Михаил Александров ден Андрей Яруков, Ларисам – Марина Трутникова, Кристина Лебедева да Мария Андреева, Лешам – Павел Ефимов ден Андрей Юнусов модаш тӱҥалыт. Германын рольжым Иван Соловьёв ден Игорь Антропов чоҥат.

16 июнь марте жап шагал кодын. Репетиций? Репетиций! Репетиций… У артист-влак дене ямдылыме «Йӧратымаш? Йӧратымаш! Йӧратымаш…» спектакльым 16 июньышто ончаш толза! Вучена!

Автор: Татьяна Светлакова, театрын завлитше.
#МариАрслан #театр #спектакль #культура
#искусство #сцена #артист #йошкарола #МарийЭл

phoca_thumb_l_yorat2.jpg

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.