Тиде фильм марий кумылжо дене шергакан

Вход на сайт

9 да 10 сентябрьыште Сыктывкар олаште (Коми Республик) «Ял ӱмбалне мужыр йӱксӧ» у марий художественный фильмым икымше гана тӱшка калыклан ончыктеныт. Тушто 9-13 сентябрьыште Финн-угор калык-влакын ончымо сымыктышыштын «Туйвеж» («Корнывож») III тӱнямбал фестивальже эртен.

Фестивальын конкурс программышкыже Российын тӱрлӧ регионжо да Эстоний гычат модмо ден документальный кӱчык фильмым профессионально да шке семын войзышо-влак, фотограф-шамыч чумыргеныт. Чылаже конкурсыш финн-угор, спорт да йырым-йырысе пӱртӱсым аралыме тематике дене кылдалтше 85 йодмаш пурен, тушеч 58-жым жюри кокымшо этапыште ончаш ойырен. Марий Элын чапшым Тамара Пакеева (фильмже – «Азам мушмаш»), Иван Герасимов («Онар калыкем», «Путешествие в царство берендея») да Сергей Поздняк («Легенда озера Карась») араленыт. Т.Пакеевын пашажым спецпӧлек дене палемденыт, а И.Герасимовын «Путешествие в царство берендея» ден Сергей Позднякын пашаже лауреат лӱмым суленыт.

5.JPG

8.JPG

Фестиваль кышкарыште конкурсышто таҥасыше да конкурсдымо фильм-влакым ончыктеныт; «Перекрёсток северных дорог» фотовыставке пашам ыштен; драматургий, режиссур, фотографий, телепрограмме ден видеосюжетым ыштыме шотышто мастар-класс-влак лийыныт.

6.JPG

9.JPG

А у марий кином икымше гана Фестивальыш чумыргышо-влак ужыныт. Презентаций годым «МАРИКИНО» студий, у марий фильмым ыштыме ойыртем, съёмко кузе эртыме нерген продюсер Николай Мамаев, фильмым шындыше режиссёр Олег Иркабаев, актёр Виктор Апталиков да креативный продюсер Эльвира Куклина ойленыт. Виктор калыкым мотор марий муро дене кумылаҥден, вара чылан кином рӱж онченыт.

IMG_1023-.jpg

Вес кечын «Ял ӱмбалне мужыр йӱксӧ» фильмым Российысе Финн-угор тӱвыра рӱдерыште ончыктеныт. Тушко студент да тыглай еҥ-влак чумыргеныт. Тиддеч вара марий кином ыштыше-влак режиссёр, Финн-угор тӱвыра рӱдерыште информаций проектирований да аналитике паша пӧлкан редакторже Олег Митюшёв дене вашлийын мутланеныт, кино дене кылдалтше ятыр йодышым каҥашеныт. Вет профессионал дене вашлиймаш эреак пайдале, ончыклык пашаланат полшен кертеш.

Коми Республикыште кинематографийлан 40 наре ийым пуышо Альбина Штам у марий кино нерген тыгерак ойлыш: «Фильм сайын лектын. Тудо чылт марий шӱлышан, калык йӱла, койыш чиемыште, ялысе чоҥышышто, йырым-йырысе пӱртӱсыштӧ раш коеш. Мо мыйым ӧрыктарен да куандарен – тиде герой-влакын яндар шинчаончалтышышт, поро да почылтшо кумылышт. Нунын ойыштлан, ыштыш кучыштлан пӱтынек ӱшанет. Вес могырым, фильм шочмо йылме дене войзалтын. Шке йылме дене кужу кином ыштымаш – тиде моткоч сай да кӱлешан паша! Тӱрыс усталык группылан умбакыжат кӱкшытым, у деч у сеҥымашым тыланем. Вигак шижалтеш, те шке калыкдам, йылмыдам, йӱладам чот йӧратеда. Вес семын ойлаш гын, те пашам окса деч икмыняр пачаш чотрак акледа. Ончыкшымат тыгак лийже».

Автор: Эльвира Куклина.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.