5-7 августышто Финляндийын рӱдӧ олаштыже, Хельсинкиште, МАФУН-ын (Самырык финн-угор калык-влакын ассоциацийышт) XI Конгрессше эртен.

Погынымашыш Россий, Финляндий да Эстоний гыч самырык делегат ден эскерыше-влак ушненыт. Марий делегаций Марий Элысе 4 мер организацийын еҥышт гыч шоген: Алёна Иванова, Евгений Сиваев, Наталья Венина («ВийАр» ушем), Андрей Эманов, Эдуард Оразаев («У вий» ушем), Светлана Кушакова («Кугарня» газет), Надежда Николаева, Влад Николаев («Югорно» ушем), Евгений Чашкин («Марий Ушем»), Василий Петров (МАФУН-ын экс-президентше, Кугурак-влакын советышкышт пурышо).

Икымше кечын МАФУН-ын президентше Василий Немечкин да Координационный Ушемын еҥышт кок ияш пашашт нерген докладым ыштеныт. Вес кечын кок секций пашам ыштен. Марий делегат-влакат каҥашымашке ушненыт, посна проблеме шотышто шке шонымаштым почын пуэныт. Эн тургыжландарыше йодыш-влак, очыни, МАФУНын ончыкылык паша план дене кылдалтше секцийыште лийыныт. Ассоциацийым регистрироватлыме да член-влакым идалык шотышто радамлыме йодыш-влак ӱчашымашым шочыктеныт. Тидлан кӧра икымше йодышым Конгрессын йӱклымашке луктыныт. Шукынжо регистрацийым эртымылан йӱкым пуэныт. Тиде йодышым ынде у Правлений решатла. Каласен кодыман, МАФУН-ын Президентшылан икымше гана финным ойыреныт – Сампса Холопайненым. Ончычсо дене таҥастарымаште, кок вице-президентым огыл, а кумытым сайленыт: Василий Немечкин (Мордовий), Яна Сажина (Коми), Лаур Лыхмус (Эстоний). Марий Эл гыч Правленийыш Евгений Сиваев пурен, тудо марий самырыктукым коклаште координаций пашам эртараш тӱҥалеш.

Пашалан - жап, а канышлан - шагат. Яра жапыште самырык марий-влак Хельсинкиште экскурсий дене коштыныт, ола дене палыме лийыныт. Конгресс деч вара икмыняр марий делегат пошкудо элыш - Швецийын рӱдӧ олашкыже, Стокгольмыш - теплоход дене Балтик теҥызым вонченыт. Йот элысе илышлан шукынжо ӧрыныт: асфальт кӱан, трамвайыште контролер уке, отельыштат ресепшн уке да, мемнан ак дене таҥастараш гын, тушто чылажат шерге. Икманаш, самырык-влак йот элыш логалмылан йывыртеныт, молан манаш гын, мер паша амал дене миен коштын, нуно шуко у еҥ дене палыме лийыныт, финн да англичан йылме практикым эртеныт, да тыгак Санкт-Петербургышко, Хельсинкишке да Стокгольмышко «йолым пыштеныт».

«МАФУН-ын полшымо дене шуко у проект-влак илышыш шыҥдаралтыт да шукталтыт манын ӱшанена, туддеч деч сай лектышым вучена да тидлан кертме семын полшаш тӱҥалына», - каласышт самырык-влак.

Автор: Наталья Венина.