19 августышто, Саска илян кечын, «Саскавий» марий ӱдырамаш ушемын чолга еҥже-влак Курыкмарий кундемыш миен коштыч. Тушто лийыч: «Саскавий» ушемым вуйлатыше, Марий Элысе тӱвыра министрын алмаштышыже Галина Ширяева, «Марий туныктышо» мер организацийым вуйлатыше Зинаида Артюшова, Торгово-технологический колледж гыч туныктышо Надежда Казанцева, йоча педиатр Маргарита Тойшева, пӱй мастар Зинаида Александрова, журналист-влак Эльвира Куклина, Анастасия Эманова да Надежда Пекасова, оператор Николай Казаков, артист-шамыч Марина Почтенева ден Михаил Окунев. А нуным Акпарс мландыште тыгаяк чолга ӱдырамаш-влак вашлийыч: районысо тӱвыра пӧлкам вуйлатыше Лидия Смирнова, кумдан палыме кӱслезе Фаина Эшмякова, туныктышо, тӱрызӧ Тамара Петрова да молат. Тыгак район адмнистрацийым вуйлатыше Леонид Кубеков пырля лие.

• "Саскавий" Курыкмарий районышто (фото, видео)

Уна-влакым поро йӱла почеш Акпарс памятник воктене вашлийыч, верысе оҥай вер-влакым палемдыме карте дене палымым ыштышт. Тушечак экскурсий тӱҥале, вара Картуксолаште Акпарсым тойымо верым ончал савырнышт, Йоласалыште «Еш пиал парк» дене палдарышт. Палемдыман: тиде паркым калык шке вийже дене ыштен, да кызыт тудо йочажынат, кугыжынат, самырыкшынат, ийготанжынат йӧратыме верышкыже савырнен.

Салымсолаште Никон Игнатьев лӱмеш тоштерыште йыргешке ӱстел эртыш. Тунам «Калыкын тӱвыра йӱлажым шуйымаште ӱдырамашын да аван рольжо» йодышым тарватышт. Кажныжын ойлышаш шомакше ятыр ыле. Йыргешке ӱстел йыр тӱҥ шотышто ешымат пеҥгыдын кучен моштышо, пашаштат, мер илышыштат чолгалык дене ойыртемалтше ӱдырамаш-шамыч чумыргеныт, сандене чыланат шке сомылышт нерген ойлаш тыршышт. Вигак шижалтеш: вуйым шийын тунемын огытыл, кырча-марчам шкеак тӧрлат, кугурак йодыш ончылнат ӧрын огыт шого – садак йӧным муыт. Теве йочасадыште, школышто йоча-влакым шочмо йылме деке шӱмаҥдыме сомыл нерген ойлышт.Иктышт икшыве-влак дене пырля почеламутым возаш пижыныт гын, весышт кӱслеште эҥертышым муыныт…

Чынже денак, марий ӱдырамаш шке ойгыжым муро, куштымаш да кидпаша полшымо дене лыпландараш тунемын; куанжымат чыла тиде сомыл дене пайла. Курыкмарий районын кажне гаяк солаштыже тӱрлӧ сынан ӱдырамаш клуб уло: я кидпаша, я сылнымут, я муро-куштымаш дене кылдалтше.

Йыргешке ӱстел годым поэтесса Мария Илдушкинан почеламутшо негызеш ыштыме проект презентаций лие. Электрон йӧн дене ыштыме паша курыкмарий вургем нерген каласкала. Тиде материалым школлаште кучылташ пайдале. Ты шотышто вашлиймаш годымак ойлышт, да Зинаида Артюшкина тӱрлӧ школышко, ювалтыде, тиде презентаций дене лекташ темлыш, верысе-влак уло кумылын вашлияш сӧрышт.

Тиде кечын муро семат, кӱсле кылат, почеламутат шуко йоҥгышт. Варажым верысе марий кочкышым, садпакча саскам тамлен ончышт.

Йошкар-Ола гыч делегаций Козьмодемьянскыш Кава йымалсе тоштерыш пурен лекте.

Мо дене пайдале тыгай вашлиймаш, тыге ола гыч ялыш лектын коштмаш? Мутат уке, эн ончыч, шинчаваш ончен мутланымаш дене. Ме икте-весылан эҥертен илышаш улына, шке пашанам весылан ончыктен, сай акым налын, у сомыллан кумылаҥына, чын але чын огыл ыштымынам тергена. Южо йодышлан, кертме семын, пырля каҥашен, вашмутым муына. Пушеҥге пушеҥгылан эҥерта, айдеме – айдемылан, а ӱдырамаш ӱдырамашлан чонжым почеш.

Автор: Эльвира Куклина.