• Полтыш он калык чонышто
• Полтыш онлан вуйым савен (видео, фото)

Киров кундем Малмыж район Кугу Кетек селаште Акпатыр оным (3 августышто) шарналтымеке, кумылан-влак Малмыж олашке Полтыш курыкыш кудальыч – Полтыш оным шарналташ.

Такшым Малмыж олан курыкышкыжо марий калык 1998 ий гыч коштеш. Варарак тушто изи кӱ-влакым иктыш чумыраш тӱҥальыч. Эркын-эркын пече печылалте, а ты гана ялт у сӱрет почылто – йытыра постаментыште кугу кӱм вераҥдыме, умбалнырак пече коклаште - кок кугу меҥге. Тушто ныл йылме дене – марла, одыла, рушла да татарла – «Пелед, тӱзлане, кугезе мланде!» манын возымо.

Тӱҥ онаеҥ Александр Таныгин «Ший мундыра» книгаштыже палемден: «2005 ийыште мыланем трук Малмыж вел Кетек ялын эргыже Николай Иванович Зайцев йыҥгыртыш.

- Александр Иванович, мый Тошто Кетек ялеш Кугу Отечественный сареш лийше-влаклан мемориал чапкӱм шогалтынена. Фундаментым кӱнчымашке туран волен улына. Кугу онын капышкыже тӱкненна. Кап иктаж кок метр кужутан, воктеныже шлем уло, керде, пикш-йоҥеж. Ик тесте пикш. Мом ыштыман?

Мый вашештышым: онын капшымат, сар ӱзгаржымат тарваташ огыл. А ӱмбакыже шонымо чапкӱым шогалташ. XX курымысо марий патыр-влакын XVI курымысо он дене вашлиймышт – тиде кугу палан вашлиймаш. Тиде Ош Кугу Юмын марий-влак деке поро деч поро шӱлышыжым ончыкта».

Полтыш курыкыш чумыргышо-влак коклаште онаеҥ-влакат ятырын улыт ыле. Нуно Юмылан, Полтыш онлан пелештышт… А тиде верым йӧнештараш верысе калык чот полшен. Тунам Николай Зайцевын, Пошкырт вел гыч Семён Новиковын, Марий Эл гыч Владимир Козловын лӱмыштым палемден кодышт.