Марий Элыш тале спортсмен, актёр толын

Вход на сайт

2016 ий 14 сентябрьыште Марий Элыш американ да руш актёр, спортсмен, шуко спорт таҥасымаште сеҥыше Олег Тактаров толын. Тудым кок кече жапыште ятыр вашлиймаш вуча, Йошкар-Ола дене палыме лиеш.

Уста айдеме Т.Евсеев лӱмеш марий калыкле тоштерыште лийын, Калыкле президент школ-интернатыште самырык спортсмен-влаклан лекцийым эртарен. Тыгак марий мер пашаеҥ-влак дене М.Шкетан лӱмеш Марий кугыжаныш драме театрыште вашлийын.

…Омса почылт кайышат, пӧлемыш лопка туп вачан, пеҥгыде шинчаончалтышан пӧръеҥ пурен шогале. Тӱмыр-шӱвыр сем унан чонжым виг савырале, театрын артистше-влак мурым мурен, пура да мелна дене сийлен, Олег Тактаровым кокымшо пачашыш ужатышт. Тыштыже тудым рӱж совым перен, алал кумылын вашлийыч. Тиде ввшлиймашке «Арслан» этнокультур интернет-журнал гыч ушненыт.

Ончыч уналан мутым пуышт. Тудо шкеж нерген икмыныр шомакым каласыш. Теве армий деч вара Олег Америкыш актёрлан тунемаш пураш шонен пыштен. Тыгак шукертсек спорт дене кылым куча. Шуко гана рингыш лекмеке, тудлан шке илыш верч пеҥгыдын кучедалаш верештын.

Кузе те киношто модаш тӱҥалын улыда? Тиде йодышлан тудо шыргыжал, тыге вашешта: «Шке мый нимом ыштен омыл, тыге пӱралтын. Чыла вере логике кыл уло».

Олег Тактаровын кочаже марий улмаш, йылмым сайын пален, сандене тачысе актёрат «марий улам» манын ойла. Теве тудлан марий кочкышым тамлен ончаш логалын: «не мог остановиться» манеш.

Актёр Йыван Кырлам жапла, «Ой луй модеш…» мурыжымат пала. Но шкеже, чаманен каласаш логалеш, марий йылмым палыдымылан кӧра иктаж киношто марла муренат, марла ойлен колтенат огеш керт.

Тыгодым Олег Николаевич палемдыш: «Республикылан шкем чотрак ончыкташ кӱлеш, шке койыш-шоктыш деч калыклан вожылаш огеш кӱл».

Ме палена, Олег Тактаров «Мост искусств» кинофестивальлан негызым пыштен. Тудо уло кумылын мемнамат у шонымашан, шкешотан кино дене ты фестивальыште вучаш тӱҥалеш.

Мучашлан Олег Тактаровлан пӧлек-влакым кучыктышт. «Кажне марий еҥын марий тувыржо лийшаш»- манын, унана тувырым уло кумылын чиен шогале, марла тавалташат йӧн лекте.

Тыгеракын вашлиймашна тӱшкан войзалтмаш дене икешлалте да, мутат уке, кумдан палыме актёр да спортсмен дечын автографым налаш куанле.

Автор: Алина Макарова.
Фото Анна Васильеван.
Хэштег: #МариАрслан #театр

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.