Алексей Алексеев нерген (видео)

Вход на сайт

"Марий Эл ТВ-ыште" -
чолга марй пӧръеҥ Алексей Алексеев дене интервью

Алексей Геннадьевич Алексеев – Марий Эл Йошкар-Олан шочшыжо. 1974 ийыште шочын, 1990 ийыште Национальный президент интернат-школым тунем пытарен. 1990-1994 ийлаште И.С.Палантай лӱмеш республикысе тӱвыра да сымыктыш колледжыште театр пӧлкаште шинчымашым налын. Колледжыште тунеммыж годымат, варат Марий самырык театрыште пашам ыштен. Тиде жапыште тӱрлӧ рольым чоҥен: мутлан, Тойгелдым "Айвика" (С.Николаев) пьесыште, Пионерым "Эх, илышет-шереметет" (М.Шкетан) драмыште, Илем каҥашын еҥжым "Ӧртӧмӧ он" (Г.Гордеев) пьесыште, Поэтым "Эрге" (В.Домрачев) спектакльыште. Тыгак рушла модын: «Ревизор» (Н.Гоголь) пьесыште Хлестаковым, «На дне» (М.Горький) драмыште Бароным, «Дядя Ваня» (А.Чехов) пьесыште Телегиным.

y_0250bd99.jpg

1994 ийыште Марий Эл правительствын направленийже почеш Эстонийыш тунемаш логалын. 1994-2000 ийлаште Таллинн университетысе тӱвыра факультетын фильм да видео пӧлкаште тунеммеке, документальный кинон режиссёржо дипломым налын. Диплом пашаже – Эстонийысе «Эстинфильм» кинокомпанийыште ыштыме да марий калыкын чимарий йӱлаж нерген каласкалыше «Чумбылат курык» фильм.

В 2003 ийыште «Этномедия» кинокомпанийым ыштен, лӱмынак этнографический фильм-влакым войзаш.

2008 ийыште эше ик дипломым – искусствоведений магистр дипломым – кино да медиа сымыктыш дене Балтийский школышто арален. Тиде Марий Эл Курыкмарий районышто эртаралтше «Мыры айо» фильм лийын.

Алексей Алексеев 2009 ий гыч видео специалистлан Таллинн университетысе инфотехнологий пӧлкаште пашам ышта да эше Сауэ гимназийыште аудиовизуальный видео урок-влакым вӱда.

Тудо ятыр этнографический фильмым войзен: «Морко сӱан» (1998), «Чумбылат курык» (2000), «Пеледыш айо» (2005), «Кӱсӧ памаш» (Урал марий-влак нерген, 2009), «Мӱкш отар» (2010), «Акпатыр чочой» (Киров марий-влак нерген, 2011), «Сӱрем» (Моркышто эртаралтше Сӱрем нерген, 2013) да молат. Кажне фильмже могай-гынат конкурсышто таҥасен, тӱрлӧ элыште ончыкталтын.

Мер илышыштат Алексей моткоч чолга. Мутлан, марла куштымаш шотышто мастер-класс-влакым тӱрлӧ вере эртара.

Материалым ыштыме годым тиде сайтлан эҥертыме:
http://mariuver.wordpress.com

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.