Урал марий нерген фильм (фото, видео)
Вход на сайт
Урал марий-влак нерген «Кӱсӧ памаш» документальный фильмым режиссёр Алексей Алексеев ныл йылме дене ыштен: марла, эстонла, рушла, англичанла.
Ожно угро-финн-влак мландым Балтик теҥыз деч тӱналын Урал марте айленыт. Арам огыл таче урал марий-влак Свердловск областьын кечывалвел-касвелныже да Пермь кундемын йӱдвел-эрвелныже илат. Нунын нергенак режиссер Алексей Алексеев кином ыштен. Тидлан лӱмынак тудо Свредловск областьыш миен коштын.
Кызыт урал марий-влакын ожнысо марий йӱлам аралыме рӱдӧ вержылан Свредловск областьысе Изи Тавра ял шотлалтеш. Тиде ял воктен кумалме ото верланен. Тушко Изи Тавра ялысе калык кумалаш коштеш, да ты отышто Кӱсӧ памаш йоген вола.
Кӱсӧ памаш нерген кином ышташ Алексей Алексеевын шонымашыже шукертак шочын. Молан манаш гын, тыгай памаш нерген шуко колалтын. Тудын эмлыме вийжат уло, садлан марий-влак тышке чӱчкыдын толыт. Вӱдым налме деч ончыч, пар деч посна тыгыде оксам кудалтен, тудым сулат, тиддеч вара гына вӱдым тӱкаш лиеш: кум гана кидым мушман, кум гана шӱргым шӱалтыман, кум гана подылман. Памаш воктек поро шонымаш да поро тыланымаш дене мийыман. Вӱд, ӧраш веле кодеш, шонымым илышыш пурта. Калыкыште ойлат, кузе осал шоныш дене толшым але тудым орлышым вӱд тӱнчыктара.
Кызыт Алексей Алексеевын «Кӱсӧ памаш» киножым ныл йылме дене ончаш лиеш: марла, рушла, эстонла да англичанла.
Автор: Ирина Тойгильдина. Фото: http://anthill.ucoz.de
