Августын икымше шуматкечыже лишемеш, тугеже марий калык, йӱла почеш, Киров кундем Малмыж районын Кугу Кетек ялышкыже вашка. Тушто 2015 ий 1 августышто кугу кумалтыш лиеш, 11 шагатат 30 минутлан тӱҥалеш. Чумыргышо-влак Акпатыр онлан вуйым сават. Тиде кечынак Малмыж олаште верланыше Полтыш онлан пыштыме кӱ воктекат миен пелешташ лиеш.

"Кӱсото. Святая роща" книгаште Ираида Степанова тыге возен: "Изиж годым Акпатыр тулыкеш кодын, да пуйто тудым верысе мурза ашнаш налын. Шкенжын кок эргыж дене пырля тудланат сай шинчымашым пуэн, туныктен луктын. Варажым Акпатыр марий йоча-влаклан школым почын, нуным Юмым пагалаш да илышым чын аклаш туныктен. Тудын ойжо почеш марий-влак ялыш чумырген илаш тӱҥалыныт. Акпатыр уста эмлызе лийын, таза кап-кылым арун кучаш туныктен. Эмлыме годым памаш вӱд дене пайдаланен, Вӱд Аван вийжым йодын моштен. Колымекше, йодмыж почеш, тудым Кетек ял мучаште кугу курык йымалан тоеныт. Шнуй еҥ шке поро вийжым шуко гана калыклан палдарен, ятыр еҥым осал чер дечат утарен, пиалан, улан илыш дене илаш йӧным ыштен шоген. Татар, руш, марий-влак тудлан пырля кумалыт. Пытартыш жапыште тышан чапле чапкӱм шынденыт. Калык вуй саваш тӱрлӧ кундемла гыч толеш".

Палемдыман: Акпатыр онлан кумалме йӱлалан негызым тусо предприниматель Валерий Соловьёв пыштен. Тудо шкеже жап деч ончыч илыш дене чеверласен, но тӱҥалме суапле пашажым родо-тукымжо шуя.

Чынак, Акпатыр онын вийже кугу! Тидым шуко еҥ шижын шуктен да раш пала: тудо айдеме тукымлан полша!

• Пайрем программе
• Акпатыр он вий-куатым пуа! (фото, видео)