Арслан – сеҥыше, виян да эрыкан кайык

Мемнан журнална «Арслан» маналтеш. Тудо марий калыкын илышыж, шкешотан да оҥай тӱвыраж ден йӱлаж, чыла тиде поянлыкым арален кодымо да тукым гыч тукымыш кусарен шогымо нерген каласкала. Да, ала-можо вашталтеш, уэмеш – тиддеч посна огеш лий, вет илыш ончыко ошкылеш.

Тиде журналын лаштыклаштыже кажне еҥ шкаланже оҥайым, пайдалым муын кертеш. Тӱткынрак ончал, шымле.

Марий йылме гыч рушыш кусараш гын, «арслан» орёл кайыкым ончыкта. Марий пӧръеҥ лӱмат тыгай уло – Арслан. Мутат уке, тудо тюрк йылме гыч толын.

Арслан лӱман еҥ изинекак лӱддымылык дене ойыртемалтеш. Тудо шкетын кодаш да пычкемыш деч огеш лӱд. Койышланен мошта, кучедалаш амалым кычал муын кертеш, но-о изи да шкеж деч лушкыдырак «тушман» дене кучедалаш огеш тӱҥал. А марий чодыраште илыше сарзе калык лийын.

Марийын тӱвыраж ден йылмыж вияҥмаште моткоч кугу кышам тюрк калык коден, вет марий калык циливизаций дене кылым кучаш тӱҥ шотышто булгар-влак гоч тӱҥалын. Йыван кугыжан Озаҥым налмекыже, марий-влак Московийын тӱвыраж дене, вес семынже, тунам шочшо руш культур дене ваштӱкненыт.

Марий калыкын пӱрымашыже куштылго лийын огыл, тудо историйыште шуко нелым-йӧсым чытен лектын: йот индырымашымат, эрык деч посна илымымат, геноцидымат, виеш христиан верам тушкымымат, национальный виешлымашымат. Тыгодым тудо илыш деке йӧратымаш кумылым, эрыкым арален коден кертын, ялт Юмын кайыкше семын - арслан семын. Арслан – тиде кава кӱкшытын, сеҥымашын, эрыкан койыш-шоктышын да кугу вий-куатын палыже.