«Театр йоча шинча дене» выставкым идалык мучко ончаш лиеш

Вход на сайт

Марий Эл Республикысе йоча да самырык-влаклан театр-рӱдерыште 2016 ий 1 июньышто «Театр йоча шинча дене» выставке почылтын. Тудо Театр-рӱдерын 25 ияш лӱмгечыжлан да Йочам аралыме тӱнямбал кечылан пӧлеклалтеш. Оҥай деч оҥай усталык паша дене идалык мучко палыме лийын кертыда. Выставкым спектакль деч ончыч ончаш лиеш але вес жаплан (театр мучко экскурсий семын) мутланен келшаш йӧн уло.

Выставкыште 63 сӱретым – «Театр йоча шинча дене» республикысе сӱрет конкурсышто сеҥыше-влакын пашаштым вераҥдыме. Тудым январь тӱҥалтыште увертарыме ыле да тыгак Марий Эл Республикысе йоча да самырык-влаклан театр-рӱдерын (Марий самырык театр) 25 ияш лӱмгечыжлан пӧлеклалтын.

Чылаже конкурсыш 163 паша пурен. Эн шуко 49 сӱретым Семёновкысо школ-интернат гыч колтеныт, 42 – Йошкар-Оласе 27-ше №-ан школ гыч, 22 – Марий Турек посёлкысо йоча сымыктыш школ гыч. Тыгак Йошкар-Оласе 9-ше, 23-шо да 29-ше школла, 4-ше ден 14-ше №-ан гимназий-влак, 11-ше №-ан лицей, Калыкле президент школ-интернат, «Азбука» студий, Медведево районысо Руэм школ ден У Арбан йочасад, Морко районысо Нурумбал школ, Провой кундемысе Кожласола «Теремок» йочасад, Морко посёлкысо 1-ше, 2-шо, 3-шо да 4-ше №-ан йочасад-влак ушненыт.

Кажне номинацийыште ик сеҥыше дене палемдыме. «3 гыч 7 ий марте» номинацийыште Матвей Кудинов сеҥен. Тудо «Сказка о царе Салтане» спектакльым сӱретлен. Шкеже Матвей Семёновкысо школ-интернатыште тунемеш.

«8 гыч 12 ий марте» номинацийыште Егор Коновалов (Семёновкысо школ-интернат) лектын. Тыгак «Сказка о царе Салтане» сӱрет дене сеҥен.

«13 гыч 17 ий марте» номинацийыште Дина Бирюкова (14-ше №-ан гимназий) «И с нами голуби» пашаж дене ойыртемалтын.

Лауреат лӱмым суленыт: Виктория Ившина (Марий Турек посёлкысо йоча сымыктыш школ, «Царь и царевна» паша), Саша Кузьминых (Марий Турек посёлкысо йоча сымыктыш школ, «Театр глазами детей» («Против кого дружим»), Дмитрий Вичужанин (Семёновкысо школ-интернат, «Сказка о царе Салтане»), Айгюль Байрамова (Нурумбал школ, «Русская соль»), Дарья Кочергина (Йошкар-Оласе 23-шо №-ан школ, «Сказка о царе Салтане»).

Тӱрыс ончалмаште, йоча-влак Театр-рӱдерыште пел ий мучко ончымо спектакль-влакым сӱретленыт. Шукышт шке пашаштышт «Сказка о царе Салтане» йомакым ончыктеныт. «И с нами голуби», «Против кого дружим», «Приключения Чиполлино», «Русская соль» спектакль-влакат сӱретышке возыныт. Театр нергенат шке шонымашыштым чия полшымо дене почын ончыктеныт.

Конкурсын да выставкын спонсоржо «Лёд и пламень» фирме лийын.

Тыге сеҥыше-влакым диплом дене палемдыме, туныктышо-влаклан тауштымашым кучыктымо. А сертификат кажне участниклан логалын. Тудым кӧ эше налын шуктен огыл – Театр-рӱдерыш толза, йыҥгыртыза. Телефон номер: 8-917-703-66-24.

Театрын сайтше: http://mari-tuz.ru. Вконтактыше группо: https://vk.com/mari_tuz.

Пагален, Эльвира Куклина.

Mari
Tags: 
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.