Йӱлашке пурышо Колумб лудмаш тений 29 июньышто Морко район Чавайнур ялыште да 24-ше гана эртен. Тудо Сергей Чавайнлан пӧлеклалтын, вет тений марий литературлан тӱҥалтышым пыштыше писательын шочмыжлан 125 ий темеш. Тыге участник-влак Колумбын да Чавайнын почеламутыштым, шке возымо сылнымутыштым йоҥгалтареныт.

Чылаже Колумб лудмаште шке вийжым тӱрлӧ номинацийыште 120 наре еҥ (изижат, кугужат) Марий Элын тӱрлӧ районжо, Татарстанысе Мамадыш район, Йошкар-Оласе 2-шо, 6-шо, 14-ше №-ан да Республикысе йоча усталык рӱдер гыч терген. Теве 16-18 ияш коклаште Советский район Ӱшнӱр школ гыч Николай Любимов сеҥышыш лектын.

Тиде кечын Чавайнын «Ото» почеламутшо тӱрлӧ йылме дене йоҥгалтын: Марий Элысе тӱвыра министр Михаил Васютин курыкмарла лудын, тудын алмаштышыже Галина Ширяева – англичанла, Марий книга савыктышым вуйлатыше Лидия Ильина – немычла, Морко районым вуйлатыше Светлана Иванова – татарла, Марий писатель ушемым вуйлатыше Светлана Архипова – финнла.

Тӱрыс пайрем веселан да оҥайын эртен. С.Чавайн лӱмеш этнографий комлексын садпачкаштыже выставкым вераҥденыт, тӱрым тӱрлен, куымо станокышто пашам ыштен ончаш лийын. Чавайнын пӧртыштыже вераҥдыме коҥга гыч вигак шокшо мелнам кӱэшт пукшеныт, икымше мӱй дене сийленыт. Марла мурен-куштымашат чоным вӱчкен.

Тиде кечын уна-влакат ятыр лийыныт. Мутлан, Писатель ушем-влакын тӱнямбал сообществыжым вуйлатыше Николай Стародымов, Татарстан Республикысе Писатель ушем вуйлатышын алмаштышыже Раис Тухматдулин.

Автор: Эльвира Куклина.