• Марий юнкор слёт (фото)

1-7 июльышто Шернур район Марисолаште (Марий Эл) Марий юнкор слёт кандашымше гана эртыш. Марий Элын икмыняр верже, Пошкырт кундемын Калтаса ден Мишкан районлаж, Татарстан Буймо вел гыч толшо 27 ӱдыр-рвезе «мут пашалан» тунемын. А слёт С.Г.Чавайнын шочмыжлан 125 ий теммылан пӧлеклалтын.

Слёт кышкарыште ятыр оҥай еҥ дене вашлиймаш-влак эртеныт. Теве радиожурналист Вячеслав Кольцов шке йӧратыме пашаж нерген каласкален. Марий писатель ушемым вуйлатыше, «Кече-Солнышко» журналын тӱҥ редакторже Светлана Архипова денат мутланымаш оҥайын эртен.
Поэтесса, журналист Зоя Дудина Сергей Чавайн нерген презентацийым ончыктен, йоча-влак дене пырля «Ото» почеламутын могай йӧн дене возалтмым лончыленыт, тиде сылнымутым тӱрлӧ йылме дене лудын онченыт.

Игорь Садовин деловой модыш дене куандарен.

Тыгак вашлиймашке толыныт Марий Оньыжа Анатолий Иванов, республикысе тӱвыра, печать да калык-влк паша шотышто министерствын печать да тӱшка коммуникаций управленийжым вуйлатыше Владимир Маркин, «Край Сернурский» ден «Шернур вел» газет-влакын тӱҥ редакторже Елена Лебедева да молат.

Ӱдыр-рвезе-влак кажнышт деч автографым налаш тыршеныт. Уна-влаклан «Эр вий» йоча организацийын галстукшымат пижыктеныт.

Слётын участникше-шамыч Желонко ялысе вӱдвакшыште, Шабдар Осыпын шочмо Изи Лужалу ялыштыже, Шернурысо тоштерыште лийыныт.

А тыгай слётым «Ямде лий» газет редакций Марий Элысе тӱвыра министерстве да Финляндийысе М.А.Кастрен Общество полшымо дене эртара.

Автор: Эльвира Куклина.