Самырык этножурналист школышто тÿрлö оҥай вашлиймаш эрта. Шукерте огыл ÿдыр-рвезе-влак «Кугарня» газетыш миен коштыч, тÿҥ редактор дене палыме лийыч. А 29 мартыште «Марий Эл» телевиденийыш миен тольыч. ГТРК-м вуйлатыше Мария Альбертовна Митьшева дене мутым вашталтышт, телевидений да радио паша дене ваштÿкнышт.

Уста вуйлатыше телевиденийын историйжым каласкалыш. Самырык-влаклан Мария Альбертовнан сеҥымашыш шумо корныжым палыме налаш оҥай ыле. Тудо изи годсекак журналист лияш шонен. Икымше интервьюм Мария деч йоча слётышто налыныт.

Самырык журналист-влак шкешт денат палдарышт, Школын пашаж нерген ойлышт. Тыгодым Мария Митьшевалан йодыш почеш йодышым пуышт. Мутлан, камерыш моторын, чын ойлаш манын, журналистлан мом эн ончыч палыман? А камере ончылно кузе шкем кучыман?

Вуйлатыше мыланна сай ой-каҥаш-влакым пуыш. Тыге профессионал журналистын йылмыже поян да мотор лийшаш. Тыгодым айдемылан шуко книгам лудаш кÿлеш. Тÿжвал тÿс нергенат мондыман огыл. Тележурналист шкаланже камерыште келшышаш, тунам тудо вий-куатшылан ÿшанаш тÿҥалеш. Эше икте: ушан еҥ дене кылым кучыман.

Мутланыме деч вара Екатерина Сараева, самырык-влаклан «Вариант» передачым вÿдышö, телевидений да радио мучко экскурсийым ыштыш Тÿрлö пöлемыште лийна, шуко оҥайым ужна.

Автор: Валерия Васильева.

• Самырык этножурналист школ - 2015