2016 ий пургыж тылзын 20 числаштыже, чевер да сылне теле кечын, «Самырык этножурналистын школжо» черетан погынымашыжым «Кугарня» газет редакцийыште эртарыш.

Самырык-влаклан лекше да йöратен лудмо савыктыш калыкыште кугу пагалымашым сулен. 25 ий жапыште лудшын кумылжым шижаш тунемын. Тидын нергенак «Кугарня» газетын тачысе тӱҥ редакторжо Эдуард Иманаев дене вашлийме годым мутнам вашталтышна.

«Кугарня» савыктышын ик эн тӱҥ сомылжо: лывырге да шыма марий йылме дене лудшылан республикысе, элысе да тӱнямбалсе илыш нерген уверым намиен шукташ, у шинчымашым шаркалаш. Тематикына пеш кумда, тӱрлö нерген возена, шуко проблемым нöлталына, лудшым шонаш таратена, - палемдыш у редактор. - Шукерте огыл «Чон почын» рубрике ешаралте. Туткарыш логалше айдемылан ойгыж нерген каласкалаш неле, а газет гоч, лӱмжым каласыде, тудо чонжым луштарен да полышым йодын кертеш».

Редакций ончылно шогышо йодыш-влак нергенат ойлышна. Моло газет семынак, лудшо-влак шагалемыт. Нуным кумылаҥдаш манын, газетын пашаеҥже-шамыч тӱрлö йöным кычалыт. Теве таче «Кугарня» газетым электрон подписке почеш налаш лиеш. Пел ийлан 200 теҥге оксам тӱлыман. Газетын электрон вариантше электрон почтыш толеш.

Оҥай ыле редакцийыште тыршыше еҥ-влак нергенат пален налаш. Тушто кызыт латныл еҥ тырша. Нунын коклаште Марий Элын сулло журналистшат уло: ятыр ий редакцийыште пашам ыштыше, тӱҥ редакторын алмаштышыже Ирина Степанова ӱмаште почётан лӱм дене палемдалте.

Мемнан пагалыме да йöратыме Эльвира Куклинат (этножурналист школым вуйлатыше) журналист пашажым тиде газетыштак тӱҥалын. Шым ий жапыште мастарлыкшым шуарен, тыглай журналист гыч редакторын алмаштышыже марте кушкын…

Мутланым годым Эдуард Аркадьевич мемнамат возаш таратыш, газетыш материалым колташ кумылым лукто. «Лӱдаш да вожылаш огеш кӱл, усталыкым шуарыман», - манын каласыш.

Вашлиймаш пеш порын да пайдалын эртыш, чонышто сай шарнымашым кодыш. Редакторын волгыдо шомакшат, тамле сий-чайжат кумылемым ылыжтышт, возаш таратышт. Тау, «Кугарня», ныжыл кумылетлан, чоным тарватыше оетлан. Тый денет у вашлиймашым вучем.

Автор: Ирина Павлова.
Фото Вероника Мустаеван.

• Самырык этножурналист школ - 2015

• У ТУКЫМ
• НОВОЕ ПОКОЛЕНИЕ