Марий тиште кече Сылнымут идалыкым иктешла (ПРОГРАММЕ)

Марий тиште кече лишемеш. Тиде пайремым кузе эртарен колтымо шотышто 2015 ий 3 декабрыште Марий Эл Республикысе тӱвыра, печать да калык-влакын пашашт шотышто министерствыште пресс-конференций лие. Журналист-влакын йодышыштлан министрын алмаштышыже Галина Ширяева, Республикысе марий тӱвыра рӱдерым вуйлатыше Наталья Пушкина, Марий писатель ушемым вуйлатыше Светлана Архипова, Марий кугыжаныш университетысе тӱвыра да тӱвыра кокласе коммуникаций институтым вуйлатыше Родион Чузаев вашештышт.

Марий тиште кечылан 10 декабрь шотлалтеш. Тудым кугыжаныш пайрем семын Марий Эл Республик президентын указже почеш 1998 ий 18 ноябрь гыч палемдаш тӱҥалме.

Марий тиште кече - марий калыкын ик эн кугу пайремже. Ончалаш гын, тудын историйже курым-курым торашке, акрет годсо пагытышке шуйналтеш - 1775 ий 10 декабрьыште Санкт-Петербург олаште ужалымашке лекше икымше марий грамматике «Сочинения, принадлежащие к грамматике черемисского языка» у илышыш корным почын.

Кажне ийын тиде пайрем кумдан эрта: тӱрлö акций, концерт, конкурс, книга выставке… Теве ийлан кок гана «Идалыкын книгаже» конкурс лиеш. А ынде кумшо ий почела «Марла чын возена» тӱшка диктантыш Марий Элын олаж ден яллаже гыч, тӱня мучко илыше марий-влак, марий йылмым тунемше йот еҥ-шамыч ушнат.

Теният Марий тиште пайрем кок кече 9-10 декабрьыште шуйна да Сылнымут идалыкым иктешла.

Пайремым палемдымашке Марий Элысе район да моло вере илыше марий-влакат кумылын ушнат. Теве Шернур посёлкысо 2-шо №-ан школ Йошкар-Оласе мероприятийлашкат ушна (мутлан, йыргешке ӱстелыште лийыт, дикнантым возат), шкешт денат кугу пайремым ышташ ямдылалтыт. Марий йылмым туныктышо Майя Москвинан палемдымыж почеш, 10 декабрь «Мый марла ойлем» акций семын эртышаш. Йоча ден туныктышо-влак (кеч-могай йылманат) эр гыч тӱҥалынак марла ойлаш тыршаш тӱҥалыт, тиде кечылан пырдыжгазетым ямдылат, конкурс-влак лийыт. Чылажат концерт программе дене иктешлалтеш.

Теат пайремышке, йылмым аралыме да вияҥдыме пашашке ушныза!

Автор-влак: Эльвира Куклина ден Вероника Созонова.
Фото Вероника Созонован.

ПРОГРАММА ДНЯ МАРИЙСКОЙ ПИСЬМЕННОСТИ - СКАЧАТЬ.