Марий Эл гыч Венгрийыш латик писатель кая
Вход на сайт
Бадачонь венгр олаште 2015 ий 3-7 сентябрьыште Финн-угор писатель-влакын XIII тÿнямбал конгрессышт эрта. Тушко Марий Эл республике гыч 11 еҥан делегаций каен. Тиде делегацийым Россий писатель ушемын регионысо пöлкажын председательже Светлана Архипова вуйлата.
Финн-угор писатель-влакын XIII тÿнямбал конгрессыштышт Марий кундем деч тÿҥ докладым писатель Юрий Соловьёв ышта. Молышт секцийлаште выступатлаш тÿҥалыт.
Палемдыман, Марий Элын латик еҥан делегацийыштыже самырык-влакат улыт. Тиде - Володя Матвеев ден Игорь Попов. Пашашке палыме да опытан писатель-шамыч - Зоя Дудина, Альбертина Иванова, Лидия Иксанова, Татьяна Очеева, Валерий Бердинский, Валерий Григорьев, Александр Петров - ушнат.
Тений Финн-угор писатель-влакын конгрессышт драматургий дене кылдалтше темылан пöлеклалтеш.
Палаш: Финн-угор писатель-влакын икымше литератур форумышт 1989 ийыште Йошкар-Олаште (Марий Эл Республике) лийын. Тиддеч вара финно-угор писатель-шамыч Ассоциацийыш ушненыт. Тудыжо 1993 ийыште Эгереште (Венгрий) III конгресс годым официально шочын. Тунамак Финн-угор литератур ассоциацийын икымше президентшым сайленыт да Уставым пеҥгыдемденыт. 2013 ий гыч АФУЛ-ын президентше - венгер шымлызе Янош Пустаи.
