Интернетыште «Муталан» лÿман у сайт шочын

Вход на сайт

2015 ий Российыште Сылнымут идалык семын эрта. Сылнымут йылмым, тиштым аралаш да вияҥдаш, марий калыкын литератур поянлыкшым шараш манын, Интернетыште у, тачысе кечылан келшыше сылнымут площадкым почмо. «Муталан» (mutalan.ru) сылнымут сайтым «Поэзий шепкаште» сылнымут ушем ден «ИНТЕЛЛЕКТУАЛ» тÿвыра-увер рÿдер ыштеныт. Проектын авторжо: Татьяна Соловьёва, поэтессе, кок поэзий книгам возышо, сылнымут ушемым вуйлатыше.

Mytalan_0.jpg

Кызыт марий йылме дене возымо да марий калык нерген каласкалыше сайт шагал огыл. Но, чылажымат иктешлымеке, тыгай шонымашке шумо: калыкын литератур поянлыкше нерген каласкалыше сайт але марте лийын огыл. Да, у книга-влак нерген республикысе ныл журналым ушен шогышо «Марий журнал» (marizhurnal.ru), Марий книга савыктыш (maribook.ru) сайтлаште пален налаш лиеш.

«Муталан» - сылнымутым йӧратыше-влакын сайтышт. Тыште кызытсе марий поэт, прозаик, драматург-влакын возымо произведенийыштым лудын кертыда, автор-влак нерген палдарат. Нунын почеламутыштлан возымо муро-влакым колышташ, мурылан шомакым муаш йӧн уло. Тыгак кусарыме сылнымутым лудаш темлат. Икманаш, марий сылнымут коҥга гыч лекше эн шокшо мелнажым лач тиде сайтыште тамлен ончаш лиеш.

«Эрласе сылнымутын чурийже – тачысе возгалыше». Тыге йоҥга «Муталан» сайтын тÿҥ шонымашыже. Тыште шÿм-чон йодмашым шукташ лиеш, сылнымут дене кылдалтше увер дене палдараш тÿҥалыт. Марий литератур дене кылдалтше йодышымат каҥашаш, вашмутым пырля мутланен кычалаш сай йöн.

Автор: Эльвира Куклина.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.