• Программе. Скачать

1 июльыште Йошкар-Олаште Марий йылмым туныктышо да марий тӱвыра дене палдарыше кеҥежымсе школ 11-ше гана почылтеш да кум арня шуйна.

Тиде школым Марий кугыжаныш университетын Финноугроведений институтшо эртара. Тудым почмаште филологий науко кандидат Олег Сергеевын надырже кугу. Кузе шанчызе шкеже палемда, пытартыш жапыште шуко эллаште лияш логалын, 1998-1999 ийлаште Хельсинки да Турку университетлаште марий йылмым туныктен. Занятийлашке тӱрлӧ эл гыч студент-влак коштыныт. Нуно йодыныт: «Огеш лий мо марий йылмым Марий Элыш миен тунемаш?» Тыге универститетын ректоратше дене келыштарен, марий йылме да тӱвыра курс почылтын.

Кеҥежымсе школышко йот элласе аспирант, шанчыеҥ, музыкант, тӱҥ шотышто, финн-угор калык-влакын этнографийыштым шымлыше, марий калыкнан тӱвыраж дене палыме лияш шонышо-влак толыт. Финляндий, Эстоний, Венгрий, Швеций, Франций, Польшо… Тений школышто куд еҥ тунемшаш: визытын – Финляндийысе Хельсинки университет гыч, а иктыже – Америке гыч.

Толшо-влак кечывал марте йылмым тунемыт гын, кечывал деч вара ола дене палыме лийыт, тӱрлӧ тоштерыш миен коштыт. Нуным 29-ше №-ын «Ший оҥгыр» йочасадыштат вучат. Морко ден Курыкмарий районлашке каят.