«Немда тӱҥалтышлан вуйсавыш» акций Шернурышто лиеш
Вход на сайт
2015 ий 21 августышто Шернур район Кугу Пÿнчер ял воктене «Немда тӱҥалтышлан вуйсавыш» тÿвыра-экологий акций эрта. Тиде акцийым ынде кумшо ий почела «Саскавий» марий ÿдырамаш ушем илышыш шыҥдара, вашлийше район кучем чот полша. Тушко мер да тӱвыра пашаеҥ, эколог, краевед, поэт, мурызо, журналист, верысе калык ушнат.
«Немда тӱҥалтышлан вуйсавыш» икымше гана 2013 ий 8 июньышто Кужэҥер кундем Халтурино ял воктене лийын. Вет лач тушеч Немда эҥер кужу корныжым тӱҥалеш да У Торъял гоч Шернурыш вашка, вара Киров кундемыш йоген эрта. Тыге тӱрлӧ вере илыше марий калыкым шке семынже иктыш уша.
Тыгай акций кокымшо гана 2014 ий 26 июньышто У Торъял район Татарэҥер (Часамласола) ялын Сопкан монча манме куэрыштыже эртен. Тунам Марий Элын тӱҥ онаеҥже Александр Таныгин мутым пелыштен. Чумыргышо-влак Немда эҥерын Марий Эл мучко 103 меҥгым (43-шо У Торъялыште) йогымо корныштыжо верланыше кажне гаяк илем нерген ойленыт, лӱмлӧ еҥ-влак нерген каласкаленыт. Мурымашке-куштымашке йоча-влак ушненыт. А ик эн сылне шӱпыкшӧ Марий Элын калык артисткыже Елизавета Коновалова лийын.
«Немда тӱҥалтышлан вуйсавыш» акцийын шке тамгажат уло. Тӱрлымӧ тамгам пытартышлан У Торъял район Шернур районлан кучыктен. Тыге эстафетым Шернур кундем налын.
Теният Немда нерген мурым мураш, почеламутым лудаш, шке шочмо ял нерген каласкалаш тӱҥалыт, фотовыставке лиеш, пучымышым шолтен, Вӱдавалан пелештат.
Мутат уке, Немда тӱҥалтышлан вуйсаваш, вашлийме верым йытыраяш кÿлеш. Тиде верым вес ганат каналташ йöнештараш лиеш. Тыге «Саскавий» ушем дене пырля Немдам да тушто илыше калыкым, марийын эртыме корныжым шымлена. Посна акций гоч самырыктукым коклаш йӱланам шарена. Пÿртÿс аванамат аралаш тунемына.
Автор: Эльвира Куклина.
