Тек йÿр йÿреш... Марий Эл Радиолан - 10 ий

Вход на сайт

2015 ий 1 август. Кöлан мо дене шарнымашеш кодын? Икмыняр шÿдö марий еҥлан - Марий Эл Радион 10 ияш шочмо кечыжлан пöлеклалтше да йÿр вошт эртыше концерт дене. Да тиде кечын пайремыш Марий Эл Республикым вуйлатышын пашажым жаплан шуктышо Леонид Маркелов толын, марий калыкын йöратыме радиожым саламлен да икмыняр пашаеҥлан наградым кучыктен. Теве Марий Эл Радиом вуйлатыше Александр Курмузаковым «За заслуги перед Республикой Марий Эл» орденын медальже дене суапландарен, вуйлатышын алмаштыже Ирина Якаевам да редактор Владимир Матвеевым - Марий Эл правительствын чап кагазше дене, корреспондент Марина Глушковам да тÿҥ бухгалтер Валентина Казанцевам - Марий Эл правительствын таумутшо дене.

W7HjfrgJ13U.jpg

Пайрем дене РФ Кугыжаныш Думын депутатше Лариса Яковлева да Марий Эл Кугыжаныш Погыным вуйлатышын алмаштышыже, Марий Оньыжа Анатолий Иванов саламленыт. Лариса Николаевна депутатын таумутшым Ирина Якаевалан, Владимир Аптулаевлан, Владимир Матвеевлан кучыктен. Анатолий Николаевич Мер Каҥашын таумутшым радион коллектившылан пуэн.

Концертым Марий Эл Радион тачысе пашаеҥже-влак вÿденыт. Изи йоча гыч тÿҥалын, ийготыш шушо да шÿдыр лÿмым сулышо артист-влак шке мурышт дене куандареныт.

Пайрем программе кечывал деч вара тÿҥалын. Ончыч йоча да фольклор площадке-влак пашам ыштеныт, конкурс-влак лийыныт.

Но тиде кечын пуйто кава шÿтлен: лач кечывал деч вара йÿр тÿҥалын да лым лийде йÿрын. Туге гынат калык концертыш вашкен. Кузе тидым манаш? Чоныштына патриот кумыл ила? Билетым ончылгоч налме? Але...

Палемдыман: таче Марий Эл Радион эфиржым Владимир Аптулаев, Марина Глушкова, Сергей Карпов, Людмила Карпова, Александр Кожевников, Владимир Матвеев, Татьяна Соловьёва, Марина Почтенева, Ирина Якаева келыштарат. А радиом, чынже денак, тÿрлö кундемыште илыше марий еҥ-влак куанен колыштыт.

Пайрем дене, Марий Эл Радио! У деч у сеҥымашым, кÿкшытым, кужу-кужу ÿмырым!

MrXBXxUqANE.jpg

0ngZEyLfTbo.jpg

Kay4os_-vC8.jpg

Qh7aQqXempk.jpg

bBninyc67eE.jpg

7nQR2uXRCGs.jpg

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.