Йӱштӧ Памаш (Мари-Суксы) ял Татарстан республикын Актаныш районыштыжо верланен. Тушто марий кумылан да шӱлышан еҥ-влак илат. Теве тидымак эше ик гана 23 июньышто Семык пайрем годым пеҥгыдемдышт.

Семык пайремыш Йошкар-Ола гыч посна делегаций миен. Тушто Марий Оньыжа Анатолий Иванов, Марий Элысе тӱвыра министр Михаил Васютин да молат – чылаже 13 еҥ – лийыныт. Эше М.Шкетан лӱмеш Марий театрын артистше-влак Сергей Данилов ден Евгений Сергеев калыкым куандареныт.

Но тылеч ончыч, 22 июньышто, Актаныш селаште «Яшлек» тӱвыра рӱдерыште «Мер Каҥашын» погынымашыже эртен. Тунам кок тӱҥ йодышым каҥашеныт. Иктыже – Татарстан республикысе марий мер ушем-влакын да калыкле-тӱвыра автономийын паша лектышышт нерген. Ты шотышто докладым тусо автономийым вуйлатыше Олег Третьяков ыштен.

Чынже денак, Татарстан кундемыште илыше марий-влак моткоч кугу пашам шуктен шогат. Нунын опытыштым моло регионышкат шаркалаш кӱлмӧ нерген Мер Каҥашын еҥже-влак палемдышт.

Таче кечылан Татарстанын 10 районыштыжо марий-влак тӱшкан илат. Тушто 18 школышто марий йылмым туныктат.

Тыгак погынымаш кышкарыште лишыл жаплан паша радамым пеҥгыдемдышт. Тыгодым, мутлан, Талешке кечым, йоча Пеледыш пайремым Татарстанын марий калык илыме районлаштыже да «Мый марла ойлем» этнодискотекым Озаҥ олаште эртараш кӱлмӧ нерген ойлышт. А шушаш Марий самырыктукымын Россий кӱкшытан V слётышкыжо районла гыч ӱдыр-рвезе-влакым колтымо нерген каласышт.

Семык пайремат моткоч пайдалын эртыш. Марий калыкын мастарлыкше тӱрлӧ могыр гыч угыч почылто: мурен-куштымаш, кидмастарлык, чолгалык, спорт дене кылым кучымаш, костюм да муро ойыртем… Теве Марий ӱдыр-влакын конкурсыштат оҥай ыле.

Икманаш, Йӱштӧ Памаш моткоч поро кумылым ончыктыш.