Йошкар-Олаште Регион-влак кокласе Пеледыш пайрем гÿжлыш (фото, видео)

Агавайрем, тÿрлö сынан концерт, «Кудо» конкурс, йочалан модыш, «Мелна пайрем», «Йыр куштымаш» фестиваль, этнодискотеке... Чылажым шотлен от пытаре. Моткоч шуко мероприятий 2015 ий 20 июньышто, йÿла почеш, Регион-влак кокласе Пеледыш пайрем годым эртыш. Тений тудо Марий Эл Республикын 95 ияш лÿмгечыжлан пöлеклалте, да тушко Марий Элын чыла районжо, Йошкар-Ола да марий калыкын илыме шым регион гыч ик тÿжем утла еҥ чумыргыш.

Йÿла почеш «Пеледыш пайрем» Агавайрем кумалмаш гыч тÿҥале. Тумер отышто онаеҥ-влак тÿҥ онаеҥ Александр Таныгин дене пырля Агавайрем юмылан пелештышт.

Вара Ленин лÿмеш тÿвыра полат ончылно концерт лие. Тÿрлö кундем гыч толшо чолга марий еҥ-влак колоно дене Ленин площадьыш эртышт. Тушто пайрем торжественно почылто.

«Пеледыш пайрем» дене кугу уна-влак саламлышт. Марий Элын тÿҥ онаеҥже Александр Таныгин моло онаеҥ дене сугыньмутым пелештыш.

Марий Эл Республикысе Виктер вуйлатышын икымше алмаштышыже, ялозанлык да кочкыш шотышто министр Александр Егошин 2015 ийыште шошо ага пашам сайын мучашлыме дене саламлыш да ты аланыште ойыртемалтше-влаклан пöлекым кучыктыш. Теве «Эн сай муниципал район» номинацийыште У Торъял район сеҥыш (район вуйлатыше Блинов Василий Васильевич).

Поро мутым РФ Кугыжаныш Думын депутатше Лариса Яковлева ден Марий Кугыжаныш Погын председательын алмаштышыже, Марий Оньыжа Анатолий Иванов каласышт.

Марий Оньыжа Мер Каҥашын Таумутшым Марий кугыжаныш университетын марий йылме да сылнымут кафедрын доцентше Силантий Сабитовлан, М.Шкетан лÿмеш Марий кугыжаныш драме театрын директорже Юрий Русановлан да предприниматель Алексей Ильинлан кучыктыш.

Ленин лÿмеш площадьысе сылне концерт деч вара пайрем Рÿдö каныме да тӱвыра паркыште шуйныш. Ик вере фольклор коллектив-влак шке мастарлыкыштым ончыктышт, вес вере спорт да йоча программе-влак лийыч. А «Кудо» конкурсыш 14 участник ушныш. Сеҥышыш У Торъял район лекте.

Тунамак «Мелна пайрем» конкурс лие. Тудым «Саскавий» марий ÿдырамаш ушем эртарыш. Икымше верым Кужэҥер район Чодраял гыч «Ош пеледыш» ансамбль (вуйлатыше Зинаида Петрова) сулыш.