15 июньышто Москошто "Красная Пресня" паркыште ("Выставочная" метро ст., Мантулинский урем, 5) икымше гана Пеледыш пайрем эрта.

Программыште: национальный костюм да марий кочкыш конкурс (тунамак кочкышым тамлен ончаш лиеш), сымыктыш мастар да мурызо-влакын выступленийышт, спорт таҥасымаш да тӱрлӧ модмаш. Пайремыш шкешотан сыным Йошкар-Ола гыч мийыше самырык-влакын "Марий мурсем" ансамбльышт пурта. Тыгак тӱняште ик эн кужу "Ший кандыра" куштымаш дене мастер-класс лиеш.

Организатор-влак ("Землячество Марий Эл" РОО) шижтарат: "Йӱла почеш уна-влакым пӧлек дене вучена. Артист-влаклан, тӱрлӧ конкурсышто сеҥыше-шамычлан кучыкташ изирак пӧлекым кондеда ыле гын, сай. Мутлан, солыкым, нершовычым, носким да молат... Пайремышке пагален ӱжына!!! Тудо 12 шагатлан тӱҥалеш".