Фотосӱретче-романтик Пётр Васильев: Йöратем чыла моторым, йöратем чыла сайым (фото, видео)

Вход на сайт

2015 ий 27 апрельыште Марий Кугыжаныш университетыште (Йошкар-Ола) кумдан палыме фотосӱретче Пётр Васильев дене вашлиймаш лие. Мутланымашке телекӱвар полшымо дене Карелий кундем гычат ушнышт. Ты жапыштак Карелий Республикын рӱдолаштыже – Петрозаводскын рӱдö библиотекыштыже – Пётр Васильевын «Марий кундем романтик-фотосӱретчын шинчаж дене» фотовыставкыже почылто. Тиде татым интернет йöнлан кöра Марий Элат ужын керте.

sN9LPKCLQr4.jpg

Телекӱварым Марий кундем могырым республикысе тӱвыра, печать да калык-влакын пашашт шотышто министерствын пресс-секретарьже Иван Земцов вӱдыш, Петрозаводск ола могырым - фотограф-влак академийым вуйлатыше Юлия Утышева.

_4nWFj82fzw.jpg

Вашлиймашке Пётр Васильевын йолташыже, фотопашам йöратыше да Самырык этножурналист школын еҥже-влак погыненыт.

Выставкым ыштыше-влак Васильев нерген кинофильмым ямдыленыт ыле. Фильмыште Марий Элын ожнысо да кызытсе илышыжым, йӱлажым ончыктышт. Тыгак «Акрет мари» фольклор ансамбльын вуйлатышыже Алевтина Вайтович марий калыкын вургемже дене палдарыш. Алевтина, шкеже Марий Элын шочшыжо, кундемнам кöргö могыржым чын ончыктыш. «Акрет мари» ансамбль сӱан мурым мурышт, «кандыра» куштымашым ончыктышт, шӱвыр, тӱмыр да гармонь дене шоктышт.

Qr97CJzmna0.jpg

Телекӱвар жапыште документальный фотосӱретын ончыкылыкшо, самырык ӱдыр-рвезе-влакын фотосӱрет деке могай шинчаончалтышышт нерген мутланыме. Карелий велым Пётр Николаевичын пашаж шотышто шуко йодышым пуышт.

Пётр Васильев фотосӱрет-влакым ик жанрыште гына огеш ыште. Но чыла пашаже волгыдо, чоным сымыстарыше да кумылым нöлтышö улыт. «Фотосӱретче - тӱнян моторлыкшым ончыктышо айдеме. Лач тыгай еҥ Пётр Васильев», - палемдыш Иван Земцов. Чынжымак, Пётр Николаевич теле, шошо, кеҥеж, шыже пагытлам веле огыл, а кажне кечын посна татшым романтике шӱлыш дене ончыкташ тырша. Эр ӱжара, кечывал кече, кас рӱмбалге… – кажныжын шке тӱсшö, моторлыкшо. Кеч-могай татымат «кучен» мошташ мастарлык да поро шӱм-чон кӱлыт. Поро айдемын пашажат волгыдо лиеш. Арам огыл Пётр Васильевын илыш тӱҥжö лач тыгай: «Йöратем чыла моторым, йöратем чыла сайым».

Пётр Васильев шкеже Марий Эл Юлсер район Ярамарий ялыште шочын-кушкын. Н.Крупская лӱмеш пединститутышто тунеммыж годымак фотосӱретым войзаш тӱҥалын. Романтике кумылжылан кӧра тунамсе пӱтынь Совет Ушем мучко эртен, манаш лиеш. Казахстаныштат, Камчаткыштат илен.

Фотомастарын пашаже-влак Москваште, Финляндийыште ончыкталтыныт. А ынде Карелий марте миен шуыныт. Каласаш кӱлеш, фотосӱрет-влакым интернет кыл полшымо дене выставкылан келыштарыме. Пётр Васильев, кудыжым ойыреныт манын, ончылгоч пален огыл. Чылажат вучыдымо лийын.

Карелийыште выставкым ышташ «Марийцы Карелии» мер ушемым вуйлатыше Михаил Асессоров кумылаҥден. Тыге тушто выставке 15 май марте шуйна.

2unrElghCas.jpg

Пагалыме Пётр Николаевич, тек илыш-корныда кужу лиеш, пашада утыр ушнен толеш, у деч у фотосӱрет дене куандараш эреак кумылда шупшеш!

Автор: Дина Коновалова, МарГУ,
«Арслан» этнокультур интернет-журналын практиканткыже.

-Xkjl9euTQY.jpg

EelIqdIO-9Y.jpg

7i_kHO6NHus.jpg

mKJ8vMx4N60.jpg

f8MPrqE6iBk.jpg

ToztOSxF24E.jpg

Икымше лаштыкыш пöртылаш>>>

Назад на первую страницу>>>

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.