• Чыла V марий самырыктукым слёт нерген

Россий кӱкшытан визымше марий самырыктукым слёт 30 июнь гыч 7 июль йотке Волжский район Сотнур селаште верысе школ пелен эрта. Тушко 120 наре 18-30 ияш чолга ӱдыр-рвезе-влак Марий Эл, Пошкырт, Татарстан, Одо, Киров, Свердловск, Угарман, Пермь кундемла, Хант-Мансий автономный округ гыч ушнат.

Ты гана туныктымо программе «Молодёжь правительстве» теме дене кылдалтшаш. Слётыш чумыргышо-влак командыште пашам ышташ, социальный проект-влакым илышыш шыҥдараш тунемаш тӱҥалыт. Тыгак координационный совет-влакын, молодёжь парламентын, молодёжь правительствын пашаж дене палыме лийыт. Этнокультур аланыште у йӧн полшымо дене могай сомылым шукташ лиеш? Тиде йодышланат вашмутым кычал ончат.

Слёт годым ятыр лекций, практике, инноваций программе-влакын презентацийышт, мастер-класс, кидмастар мастерской, тӱвыра-историй верлаште экскурсий, кугыжаныш да верысе кучемын еҥже, мер пашаеҥ, шымлызе, артист-влак дене вашлиймаш лийыт. А культур программе С.Г.Чавайнын 125 ияш лӱмгечыжлан пӧлеклалтеш. Тыге Чавайнурыш эксурсий, поэзий кас, Марий самырык театрын спектакльже вучат.

Слётын пашажым социальный проект-влак ярминга иктешла. Тушто чолга марий ӱдыр-рвезе-влак шке проектыштым аралаш тӱҥалыт.

Палемдыман: слётыш толаш шонышо-влаклан мӧҥгысӧ пашым уже пуымо – марий тӱвыра, йылме йӱла, историй дене кылдалтше материалым кондаш. Чумырымо увер-влакым вара Марий Википедийыш вераҥдат.

Слётын учредительже-влак: Марий Эл Республикысе образований да наука министерстве, тӱвыра, печать да калык-влак паша шотышто министерстве, Мер Каҥаш.

Организатор-влак: Марий Элысе туризм шотышто комитет, Волжский район администраций, «Марий национальный конгресс» мер толкын, «ИНТЕЛЛЕКТУАЛ» тӱвыра-увер рӱдер.