15 июнышто Йошкар-Олаште йӱла почеш да ынде лӱмгечан (90 ий кугыжаныш статусым пуымылан) Регион-влак кокласе Пеледыш пайрем эрта. Тудо шке тӱҥалтышыжым 1920 ий гыч налеш. Пайремым таче Марий Элын чыла районыштыжо да марий калыкын тӱшкан илыме кундемлаштыже моткоч кумдан палемдат.

Регион-влак кокласе Пеледыш пайрем 9 шагатлан Йошкар-Оласе Тумер отышто Агавайрем кумалтыш гыч тӱҥалыт. Кумалтышым Марий Юмыйӱлан онаеҥже-влак эртарат.

10 шагатлан Ленина лӱмеш ДК воктене тӱрлӧ вер гыч усталык коллектив, мер организаций ден калык-тӱвыра мер ушнымаш-влакын еҥышт чумыргат. Ончыч икте-весе дене палыме лийыт, вара (10.45), колонныш ушнен, Ленин проспект мучко Ленин площадь марте ошкылыт. Тушто 11 шагатат 30 минутлан пайрем "Йоҥгал, марий пайремна! Чаплане, шӱмбел калыкна!" концерт дене торжественно почылтеш.

Тиде жапыштак (11 шагат гыч) Тӱвыра да каныме рӱдӧ паркыште кудо-влакым вераҥдат. Тушто шке кид гыч ыштыме тӱрлӧ ӱзгарым ужалаш тӱҥалыт. Кудо-влак коклаште конкрус эрта. Нуно 15 шагат марте пашам ыштат.

Калык 13 шагатлан Ленин площадь гыч Комсомольский урем дене Рӱдӧ паркыш кая. Тушто 14 шагат гыч концерт, спорт да тӱрлӧ моло модмаш лийыт. Тунамак марий йылмым да литературым туныктышо-влакым, марий национальный школла гыч коллектив-шамычым, эн сай пашаеҥ ден ялозанлыкым, эн чолга мер пашаеҥ-влакым саламлат.

Пайрем Ленин площадьыште этнодискотеке мучашлалтеш. Тудо 19 шагат гыч 22 шагат марте эрта. Касым марий эстраде шӱдыр-влак сӧрастарат.