Самырык этножурналист-влак Т.Евсеев лÿмеш тоштерыште лийыныт (фото)

Самырык этножурналист школышто черетан вашлиймаш 2015 ий 9 апрельыште Т.Евсеев лÿмеш калыкле тоштерыште эртыш. Тиде кечын «Марий кундемын да калыкын илышыштышт национальный тоштерын верже» теме дене вашмутланымаш лие.

Тений 25мартыште Т.Евсеев лÿмеш тоштер 95 ияш юбилейжым палемдыш. Ме,самырык этножурналист-влакат, тиде лÿмгече деч öрдыжеш ышна код, калыкнан эртыме корныж дене кылдалтше верыш уло кумылын мийышна. Тоштер пашаеҥ-влак тыгак порын вашлийыч.

Мыланна тоштерын эртыме корныжо, вияҥмыже, тудлан негызым пыштыше Тимофей Евсеев, тоштерын тачысе пашаж нерген историй пӧлкан кÿшыл шанче пашаеҥже Вадим Самойлов каласкалыш, презентаций дене палдарыш.

Кызыт историй пӧлкаште вич шанче пашаеҥ тырша, вуйлатыше - Ольга Требушкова.

Вадим Георгиевич деч вара мутым пÿртÿс пӧлкам вуйлатыше Татьяна Юрьевна Жданова нале. Ты пӧлка 1938 ий гыч пашам ышта. Тÿҥ задачыже – пÿртÿс дене кылдалтше коллекцийым чумыраш, аралаш, шотлен шогаш да тудын дене калыкымат палдараш. Тыште эше кугурак шанче пашаеҥ Ирина Бушкова пашам ышта.

Этнографий пӧлкам тоштерыште эн самырыклан да шкешотанлан шотлаш лиеш. Тудын у экспозицийже 2007 ийыште почылтын да «Обряды жизненного цикла. Традиционная культура народа мари XIX-XX вв.» маналтеш. Пӧлкам вуйлатыше Дмитрий Байдемиров этнографий аланыште шуктымо паша нерген ойлыш. Палемдыман, тыште тыршыше Дмитрий Байдемиров, Анастасия Айгузина ден Андрей Шурыгин 2014 ийыште Олык Ипай лÿмеш самырык-влакын кугыжаныш премийыштым налыныт.

Тоштерыште вич тÿҥ пӧлка пашам ышта, тушто 29 шанче пашаеҥ-влак тыршат. 2008 ий гыч тоштерыште «Ночь в музее» акций, «Евсеевский лудмаш» эртаралтыт.

Тоштерым 2014 ий гыч Лидия Никоноровна Смирнова вуйлата.

Вашлиймаш этножурналист-влаклан келшыш. Вет нуно марий калык дене кылдалтше выставкымат ончал савырнышт. Экскурсийым этнографий пӧлкан пашаеҥже Андрей Шурыгин оҥайын вÿдыш.

Тоштерын сайтше гыч увер.

Национальный тоштер экспозиций ден выставка-влакым темла: Обряды жизненного цикла: Традиционная культура народа мари XIX-XX веков; Страницы истории Марийского края с древнейших времён до 80-х гг. XX века; Удивительный мир животных. Особо охраняемые природные территории Республики Марий Эл.

Тыгак тоштерыште историй, пÿртÿс, этнографий да Марий Элын тÿвыраж дене поян коллекцийым погымо.

230 тÿжем ÿзгар аралалтеш: археологий, этнографий, документальный материал-влак, изосымыктыш дене ÿзгар-влак, биологический экспонат-влак да молат.

Автор-влак: Анна Васильева, Вероника Мустаева
Этножурналист школын тунемшыже-влак.