8 июньышто Кужэҥер кундем Халтурино ял воктене «Немда тӱҥалтышлан вуйсавыш» мер акций эртен. Тушко верысе, пошкудо Шернур да Торъял районласе, Йошкар-Оласе да моло кундемла гычат чолга еҥ-влак ушненыт. А тыгай вашлиймашым эртараш «Саскавий» марий ӱдырамаш ушем темлен да шонымашыжым Кужэҥер администраций дене пырля илышыш шыҥдарен.

Вашлиймаш моткоч порын да оҥайын эртен. Ончыч, корно укелыкым ончыде, пыл гай оварыше шыҥа деч лӱдде, чодыра коклашке пуреныт – лӱмынак ончалаш: кушеч вара Немдаже тӱҥалеш (кеч ты шотышто тӱрлӧ семын ойлат)? А вет чын, тиде верыште икмыняр памаш шинча иктышке ушна да кужу корныжым вигак шолын тӱҥалеш. Да, вийым тыштак налман, молан манаш гын, эше Торъялыш, вара Шернур мучко «куржман», Киров кундемышкат вашкыман.

Тиде верыште ик куэшке Кужэҥер Токтабеляк вел онаеҥ Вячеслав Актуганов «Немда» манын возыман солыкым ӱштылен сакыш. Тудын йыр мийыше-влак чумыргышт, онаеҥ Вӱдавалан пелештыш. Вара сукырым налын, ик эн ончыл шомакым верысе амалкалче Андрей Пайдыгановлан ты вершӧрым аралаш сугыньлен каласыш.

Умбакыже мутланымаш йӧнанрак верыште эртыш. Кӧжӧ Вӱдава лӱмеш пучымышым шолтыш, кӧ гын темлыме кнагашке шке шонымашыжым серыш (тудо Кужэҥер библиотекыште аралалташ тӱҥалеш), весе-влак шочмо кундемышт нерген каласкалышт. Тиде кечын Немда нерген ятыр почеламут йоҥгыш. А «Немда кундем» мурым мыняр гана мурышт – шотленат йомна.

Немда нерген оҥай уверым С.Г.Чавайн лӱмеш Национальный библиотекын пашаеҥже-влак ямдыленыт. Тыге нуно палемдышт: тиде эҥерын кужутшо 162 меҥге (Марий Элыште гына - 103 меҥге), а Немда «ломбо эҥер» манмым ончыкта.

Мучаште тыгай шонымашке шуыч: весканат тышке толаш, Немда эҥерлан вуйым саваш да умбакыже пайремым я Торъялыште, я Шернурышто, икманаш, поче-поче эртараш. Тек тиде изирак вашлиймаш ял нерген угыч шоналташ тарата, тек Немда вӱдна йӧным ышта ялысе илышым ворандараш, нӧлталаш.

Автор: Эльвира Куклина.

PS: Тыште фото шукырак - http://mari-arslan.ru/mari/node/154