29 майыште Марий Кугыжаныш Университет «Поступай в МарГУ!» конкурсым увертарен, тудо 16 июнь марте шуйна. Тушко абитуриент ден студент-влак ушнен кертыт. А кузе тидым ышташ? Эн ончыч Интернетыште «Вконтакте» социальный сетыште «Марийский Государственный университет» группыш ушныман да тусо «альбом» ужашыш фотосӱретым шындыман. Тӱҥжӧ, фотошто МарГУ-н атрибутикыже лийшаш: тунемме корпус воктене але кӧргыштыжӧ, туныктышо дене але университетым ончыктышо вургем дене войзалтман. Сеҥышыш лекшылан фотокамерым пуат да Марий Кугыжаныш университетын чурийже семын тӱрлӧ плакатлаште, буклетлаште ончыкташ тӱҥалыт.

Тиде конкурсыш Финн-угроведений Институтын 3-шо курсыштыжо тунемше, «ВийАр» организацийын еҥже, чолга марий ӱдыр Наталья Венина ушнен. Тудын фотожо шкешотан: кызыт МарГу-н ректоржылан шогышо Михаил Николаевич Швецовым сӱретлен. Кӱлеш атрибутикат уло: педкорпусын ик аудиторийыштыже университетысе футболкым чиен да шӱеш «МарГУ» манын возымо изи шовычым пӱтыралын. Тылеч посна «Поступай в МарГУ!» ӱжмашым возен.

Студентка университетыште тыршыше Людмила Ивановна Кошкиналан вургемым пуымыжлан пеш кугу таум ойла. Йолташыже-влакымат таушта. Вет нунын полшымо дене Наташа кызытеш тӱжем утла йӱкым поген!

Наташа шке шонымашыж нерген тыге каласкала: «Кунам конкурс нерген пален нальым, ушышкем вигак шонымаш пурыш: а мо Михаил Николаевичын портретым ышташ гын? Мый изи годсек сӱретлаш йӧратем, вот ынде толын шуын жап тидын нерген йолташем-влакланат ойлаш. Чыла деке ик йодмашем уло: йӱклыза мыйын верч, вет тендан полшымо дене гына мый сеҥен кертам. «Тӱшкаште вий!» манын ойла марий калык, садлан полшеда манын ӱшанем! Тау чылалан!»

Айста, Наташалан сеҥышым тыланена да шке йӱкнам тиде чолга да мотор ӱдырлан пуэна!