Самырыктукым шке мастарлыкше дене куандарен! (фото, видео)

Вход на сайт

Республикысе марий тӱвыра рӱдер 2015 ий 25 мартыште Калыкле президент школ-интернатыште (Йошкар-Ола) «Самырык тукым» республикысе йоча усталык конкурсым эртарен. Тудын эртыме корныжо 20 ийышкат шуын, да тений Марий Эл Республикын 95 ияш лӱмгечыжлан пӧлеклалтын.

Районла гыч лу школ да Йошкар-Ола гыч кок школ (14 №-ан гимназий ден Калыкле президент школ-интернат) шке мастарлыкыштым ончыктеныт. Чылаже 106 йоча ден 29 туныктышо лийыныт.

Пайремым Марий Эл Республикысе тӱвыра, печать да калык-влакын пашашт шотышто министрын алмаштышыже Галина Ширяева почын да поро тыланымашым каласен: «Участник-влаклан сценысе мастарлыкым, жюрилан сай паша лектышым, организатор-влаклан нӧлталтше кумылым, школ туныктышылан чон моторлыкым, усталык шӱлышым тыланем».

Samuruktykum2.jpg

Йоча конкурсым акленыт:
Олег Иркабаев, Марий Эл Республикысе йоча да самырык-влакын театр-рӱдерын тӱҥ режиссержо;
Галина Малинина, Марий Эл Республикын туныктымаш да шанче министерствын тӱҥ специалист-экспертше;
Валерий Григорьев, Республикысе марий тӱвыра рӱдерын вуйлатышыже;
Лариса Сидоркина, Республикысе марий тӱвыра рӱдерын методистше;
Виктория Воронцова, Марий кугыжаныш университетын студенткыже, хореограф.

Samuruktykum4.jpg

Жюри спектакльын тичмашлыкшым, актёр пашам, зритель дене кылым ыштен кертмыжым, режиссёр моштымашым, герой-влакын костюмыштым, декорацийым аклен.

Тыге, икымше верым У Торъял район Тошто Торъял кыдалаш школын 4 классыште тунемшыж-влак суленыт. Нуно «Мераҥын шочмо кечыже» йомакым моткоч сылнын модыныт. А йомакым, Раисия Кольцован сценарийлан эҥертен, модаш почеламут сынан текстым тӱҥалтыш классыште туныктышо Милия Торощина келыштарен.

Samuruktykum6_0.jpg

Кокымшо верыш Шернур район Лажъял кыдалаш школын тунемшыже-влак «Юзо вӱд» йомакым (В.Якимов) модын лектыныт. Коллективым вуйлатыше-влак: тӱҥалтыш классыште туныктышо Анжелика Волкова, марий йылме туныктышо Людмила Волкова, педагог-психолог Надежда Волкова.

Samuruktykum5.jpg

Кумшо вер дене Килемар район Арде кыдалаш школын тунемшыже-влак палемдалтыныт. Йоча-влак «Выдхоза дон Ши Пӱан Ши Пампалче» (Т.Иванова) йомакым модыныт. Вуйлатыше-влак: библиотекарь Ирина Петрова, туныктышо Валентина Соколова, хореограф Наталья Мерзикова.

Samuruktykum7.jpg

Коллектив-влаклан кубок ден пӧлекым кучыктеныт. Кажнышт Таумутым, сертификатым да тамле призым налыныт.

Мутат уке, кажне коллектив конкурслан чот ямдылалтын. Нуно ончыч районысо этапыште сеҥышыш лектыныт. Ӱдыр-рвезе-влак туныктышышт дене пырля йомак, легенде, преданий негызеш театр постановкым ямдыленыт.

Samuruktykum.jpg

Теве Сеҥымашлан 70 ияш лӱмгече темым Звенигово район Краснояр кыдалаш школ нӧлталын, «Тиде вер сарым ушештара» (туныктышо Ксения Васильева) сценкым модын. Калыкле президент школ-интернат «Сар годым тиде лийын» (А.Федоров возен, туныктышо Эльвира Петрова) сценкым ончыктен.

Палемдыман, конкурсышто эн изи йоча-влак Медведево район Кома школ гыч лийыныт. «У пушеҥгым шындена» музыкальный спектакль дене куандареныт. Туныктышо Тамара Шакирован гармоньым шоктымыж почеш йоча-влак муренытат, куштенытат.

Samuruktykum1.jpg

Посна рольым мастарын модыныт: Алёша Константинов ден Вика Копаева (Кужэҥер район Йывансола школ,7 класс), Никита Горбунов ден Виктория Леухина (У Торъял район Тошто Торъял школ, 4 класс); Дима Соколов ден Лиза Медведева (Волжский район Карай школ).

Пайремым эртараш Марий кугыжаныш университетын студентше-влак да Калыкле президент школ-интернатын коллективше полшеныт.

Автор: Галина Петухова ден Эльвира Куклина.

Марий Эл ТВ-ын репортажше.

Икымше лаштыкыш пöртылаш>>>

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.