А паледа, Немда эҥер кушеч шке корныжым тӱҥалеш? Тудо Кужэҥер кундем Халтурно ял воктене шолын лектеш да У Торъял гоч Шернурыш вашка, вара Киров кундемыш йоген эрта. Тыге тӱрлӧ вере илыше марий калыкым шке семынже иктыш уша.

Немда тӱҥалтышлан вуйсаваш, тудо верым йытыраяш да весканаланат шогал каналташ йӱлам ышташ ӱжыт «Саскавий» марий ӱдырамаш ушемын чолга еҥже-влак.

«Немда тӱҥалтышлан вуйсавыш» мер акций 8 июньышто эрта. Кужэҥер кундем Халтурино ял воктене 11 шагатлан вашлийыт.

Тушто Немда нерген мурым мураш, почеламутым лудаш, шке шочмо ял нерген каласкалаш тӱҥалыт, фотовыставке лиеш, пучымышым шолтен, Вӱдавалан пелештат. Эн ончыч, ту верым эрыкташ шонат. Ешарыман, тиде ий Российыште йырым-йырысе пӱртӱсым аралыме идалык семын палемдалтын.

Акцийыш мер да тӱвыра пашаеҥ, эколог, краевед, поэт, мурызо, журналист, верысе калык ушнат.

Автор: Эльвира Куклина

• Союз женщин мари "Саскавий"
• "Саскавий" марий ӱдырамаш ушем