25-26 майыште Санкт-Петербургышто марий пайрем-влак эртеныт. Тунам лачак олан 310 ияш лӱмгечыжлан пӧлеклалтше мероприятий-влак лийыныт. Тушко, эн ончыч, "Славянская ярмарка" тӱрлӧ калык да тӱвыра тӱшка-влакын ярмингашкышт тусо марий чолга еҥ-шамыч ушненыт. Марий кундем гыч "Марий памаш" ансамбль, Свердловск вел гыч "Муро памаш" коллектив миеныт.

Йошкар-Ола гыч марий сувенир, костюм дене Ираида Степанова куандарен - сай сатум чыла кумылан-влак налын кертыныт.

Икымше кечынак "Ший кандыра" фестиваль умбакыже шуйнен, вет тылеч ончыч тудо Москошто эртен. Ты гана марий сем почеш 300 метран "кандырам пуненыт".

Вес кечынже эрденак Агавайрем кумалтышыш (Ленинград кундем Всеволожский р-н Воейково села) вашкеныт. Тиде кумалтымашым Шернур онаеҥ (Марий Эл) Вячеслав Мамаев виктарен.

26 майыштак ик этнографий тоштерыште марий-влак «Вастома» мордва диаспор дене вашлийыныт. Жапым пайдалын, мурен-куштен эртареныт.