Самырык этножурналист школ пашажым тӱҥалын (фото)

2015 ий 27 февральыште «Самырык этножурналист школ» туныктымо семинар почылто. Тудо «Россия глазами СМИротворцев» Россий кӱкшытан тунемме курс кышкарыште эрта.

Школышко 15 еҥ ушнен. Тиде - 17 гыч 30 ий марте Марий кугыжаныш университетын (тӱҥ шотышто, журналистике пӧлка гыч), Юл кундемысе кугыжаныш технологический университетын, Торгово-технологический колледжын студентышт, Йошкар-Оласе школла гыч тунемше ден туныктышо ушненыт. Нунын коклаште Марий Элысе калык-влак кокласе кылым вияҥдымаш шотышто самырык министрат уло.

Туныктымо семинарым журналистике кафедрым вуйлатыше, историй науко кандидат Светлана Смирнова ден «Самырык этножурналист школ» проектым вуйлатыше, блоггер, журналист Эльвира Куклина почыныт.

Икымше занятийыште ӱдыр-рвезе-влак икте-весышт да Школын программыж дене палыме лийыныт. Тиддеч вара икымше лекций эртен. Темыже - «Марий кундемын да Россий Федерацийын этнокультур ойыртемже».

«Самырык этножурналист школ» 2013 ий годсек пашам ышта. Тудым «Интеллектуал» тӱвыра-увер рӱдер ден «Арслан» этнокультур интернет-журнал илышыш шыҥдарат. Тиддеч ондак республик кӱкшытан тыгаяк семинар Марий кугыжаныш университет пелен лийын, вара - регион-влак кӱкшытыштӧ Параньга район Олор школ пелен. Ынде Российысе калык-влак кокласе журналистике гильдий полшымо дене Марий кугыжаныш университет пелен эрта.

Мо тыгай самырык этножурналист школ? Марий Элысе ик эн сай туныктышо-влакын эртарыме этнический журналистике дене лекцийышт, шкем шуарыме шотышто тренинг, палыме журналист-влак дене вашлиймаш, вес кундемла гыч самырык журналист-шамыч дене онлайн-вашлиймаш, пресс-конференцийым, школлаште толерантность урокым эртарымаш. Мучаште Самырык этножурналист-влакын Россий кӱкшытан форумышт вуча.

Автор-влак: Ирина Павлова ден Эльвира Куклина.