Шукерте огыл Марий кугыжаныш университетыште факультет-влак коклаште футбол дене таҥасымаш эртен. Мутат уке, кажне факультет тиде модмаште сеҥынеже улмаш, но ты пиал Финн-угроведений институтын (ИФУ) командыжлан шыргыжалын. Лач тиде команде ӱдыр-влак коклаште футбол дене икымше верым сеҥен. А кузе нуно тыгай кӱкшытыш шуыныт мыланна каласа лачак ты командыште модшо Татьяна Мамаева.

- Ме икымше лийына манын, ончычак шижынам да паленам, - ойла Татьяна. – А кунам чынже денак сеҥенна – тиде нимучашдыме куан лийын. Уло команде дене йывыртенна.

Кузе палемдыш Т.Мамаева, тудо шкеже изинекак футболла модаш йӧрата. «Эн ончыч школышто футбол дек кумылаҥынам. Физкультур урокышто, яра жап годым мече дене модмо. Модаш пеш чот келшен. А ынде теве институтын чапшымат аралем», - ойжым шуйыш «мече оза».

ИФУ-н командыжлан ныл гана модаш пернен. Моло командат виян лийыныт, сеҥымаш верч чот кучедалыныт. Кажне модшылан ятыр пӱжвӱдым йоктараш пернен. Татьянан ойлымыж почеш, эн неле матч Педагогике да психологий институт дене лийын.

- Тиде матч, чынак, ик эн неле лийын. Тыште мыланна чотак тыршаш логалын. Но ме икте-весынам сайынрак шижын улына. Модмо годым кажне еҥ мом ыштышашыжым пален. Икте капкам арален гын, весышт голым пурташ уло вийыштым пуэныт. Ваш-ваш полшен модынна, а икте-весылан ӱшанымына сай лектышым ончыктен.

Финалыште ИФУ-н командыже Аграрно-технологический институт (АТИ) дене модын. Тудо матчым ИФУ-н командыже пенальтий дене сеҥен да икымше верым сулен налын.

Ӱдыр-влак чынак пеш сайын модыныт. Нунын модмыштым ончен йывыртет гына. Сеҥаш шонымо кумылышт пеш чот кугу лийын. Но тидын деч посна тыгак туныктышыштым, Анатолий Васильевич Горбатовым, палемден кодыман. Вет лач тудо модмо годым кӱлеш ойым пуэн шоген, командылан нелырак лиймеке, поро шомакше дене кумылаҥден кертын, чын корныш луктын моштен.

Таҥасымашым иктешлымек, командым пӧлек дене палемденыт: медальым, кубокым да грамотым пуэныт. Тидын деч посна Анатолий Васильевич шке ӱдыржӧ-влаклан сеҥыме лӱмеш тортым налын пуэн.

- Саламлем уло командым эше ик гана тиде сеҥымаш дене. Да таум каласыме шукта ончышо-влаклан, кудышт мемнан верч лийыныт, кумылаҥден моштеныт да сеҥымашланна ӱшаненыт, - мутшым мучашлыш Татьяна Мамаева.

Мыят тиде сеҥымаш дене ӱдыр-влакым саламлем да умбакыжат ятыр сай лектышым тыланем.

Автор: Андрей Кошаев.