Марий кугыжаныш университетыште Финноугроведений институт пелен сылнымут семинар кумшо ий пашам ышта. Тудо ончычсо ректорын, Виталий Макаровын, йодмыж почеш студент-влакым сылнымут пашалан шӱмаҥдаш манын ышталтын.

Семинарым палыме поэтесса Зоя Дудина вуйлата. Тудын йырже усталык шӱлышан ӱдыр-рвезе-влак чумыргеныт.

Теве шукерте огыл сылнымут семинарын саскажат кӱын шуо - «Юзо йÿд» («Волшебная ночь») ден «Моторем, колоем, чукаем...» («Милый мой малыш») книга-влак ош тӱням ужыч. Икымше книгаже кум йылман: марла, венгрла да эстонла. Эстон йылмыш писатель Арво Валтон, венгр йылмыш шымлызе, кусарыше Янош Пустаи кусареныт. Книга родо-тукым калык-влаклан полшышо эстон программе почеш савыкталтын.

А семинарын пашаж нерген Зоя Михайловна теве мом каласкала: «Занятий кажне арнян эрта. Ик занятийышке тӱрлӧ унам ӱжына гын, весыште семинарын участникше-влак шкеныштын возымыштым мыйын полшымо дене редактироватлат. Ме пырля йоҥылыш-влакым тӧрлена, кузе сайынрак возаш манын каҥашена. А вашлиймашке палыме писатель, журналист-влак толыт. Нуно шке усталык пашашт нерген каласкалат».

Зоя Дудинан палемдымыж почеш, семинарын посна занятийлашкыже 20-25 студент коштеш. Нунын кокла гыч ныл-вич еҥже сылнымут деке утларак шӱман улыт: почеламутым, ойлымашым, лирика сынан сӱрет-влакым возен шогат. «Чын, усталык пашам бизнес дене от таҥастаре. Тыште шийвундо нерген огыл, а чон ласкалык, кумыл йодмаш нерген ойлыман. Ме семинарист-влак дене пырля илышын моторлыкшым ужаш, шӱм-чонын вургыжмыжым шижаш да чыла тидым кагазыш сылнымут полшымо дене луктын пышташ тунемына», - ойла поэтесса.

Семинарийыш коштшо студент-влакын возымо пашашт пуракым поген огеш кий. Нунын материалышт «Марий Эл» ден «Кугарня» газетыште, «Ончыко» журналыште савыкталтыт. А теве Таня Петрова кокымшо книгамат лукташ шона. Марина Чермакован почеламут корнылажлан муро семат возалтын. Эльвира Рыжован лирика сынан сӱретше-влак лудшо-влакым куандарат. Ынде кок книга – кок пиал шулдыр – лектын. Тыге семинарын пашаже ий гыч ийыш кумдаҥын, келгемын, саем толеш, лектышат коеш.

Автор: Андрей Кошаев.

Книга-влакын презентацийышт нерген кумданрак тыште возымо - http://marsu.ru/news/index.php?ELEMENT_ID=25603&year=2013&month=5