21 январьыште Республикысе марий тӱвыра рӱдерын пашаеҥже-влак Йошкар-Оласе «Чодыра йомак» 49-ше №-ан йочасадыште «Марла ойлаш тунемына» модыш аланым эртареныт.

Йоча-влак деке унала Окси кока (Людмила Кошкина) ден Агытан (Галина Ласточкина) толыныт. Нуно «Кузе лӱмет?», «Поро кече» йылме лывыртыме модышым, «Пӧрт воктене коштына» писылыкым да «Кукареку-мареку» тӱткылыкым тергыше модышым эртареныт. Йоча-влак уло кумылын кроссвордым шымленыт, мутым чоҥеныт, «Юзо мешак» гыч лукмо марий вургемын лӱмыштым палаш тыршеныт.

Йӱк-йӱаным колын, Рывыж (Лариса Сидоркина) толын. Тудо модыш программым умбакыже шуэн – чылаштым модыктен, мурыктен, куштыктен, муным шотлыктен, икшыве-влаклан сылне мурыжым пӧлеклен.

Эн чолга йоча-влаклан Агытан «Мый марла ойлем» значокым кучыктен. Тыгай полмезыже шукын лийыныт. Талырак-влак кок значокымат модын налыныт.

Марий йылмым туныктышо Татьяна Матвеева Марий тӱвыра рӱдер пашаеҥ-влаклан таум ыштен. А изи йоча-влак у вашлиймашлан ӱшанен кодыныт.

«Марла ойлаш тунемына» модыш аланым Республикысе марий тӱвыра рӱдер тендан йочасадыштат эртарен кертеш. Ӱжса веле! Телефон: (8362) 45-88-51.

Модыш аланын тӱҥ шонымашыже: йочасадлаште, тӱҥалтыш школлаште йылме тунемме пашам модыш гоч вияҥден колтымаш, йоча-влакым шочмо йылмым тунемаш кумылаҥдымаш, марий модыш, калык вургем, йырым-йырысе тӱня дене палдарымаш.

Автор: Республикысе марий тӱвыра рӱдер.
Марий тӱвыра рӱдерын сайтше: http://mari-centr.ru.

• Марий тӱвыра рӱдер