21 майыште "Саскавий" марий ӱдырамаш ушемын вуйверже черетан погынымашке чумырген. Икмыняр йодышым каҥашымеке, лишыл жапысе паша радамым палемденыт.

Тыге 30 майыште 12 шагатлан Йошкар-Олаште Республикысе курчак театр ончылно "Ямде лий" газет редакций ден "Саскавий" ушем Йоча-влакым аралыме кечылан пӧлеклалтше мероприятийым эртарат. Тиддеч ончыч Курчак театрыште "Ямде лий" газетын 80 ияш лӱмгечыжлан да ончычсо тӱҥ редакторже Алексей Юзыкайнын шочмыжлан 60 ий темме лӱмеш пайрем лиеш. Тудо 9 шагатат 30 минутлан тӱҥалеш. Кок пайремышкыжат чыла кумылан-влакым пагален ӱжыт!!!

"Саскавийын" вес вашлиймашыже 8 июньышто (тӱҥалтыш - 11 шагатлан) Кужэҥер район Халтурино ял воктене эрта. Тудым "Немда тӱҥалтышлан вуйсавыш" акций манын палемдыме. Акцийыш Кужэҥер, Шернур, У Торъял район-влак ушнышаш улыт, вет лач ты кундемла гоч йоген эрта Немда эҥер.

Вуйвер погынымаш годым 16 майыште "Юлвий" ӱдырамаш клуб дене вашлиймашын кузе эртымыж нергенат ойленыт, тусо мероприятийлан шкешотан иктешлымашым ыштеныт.