Теле тылзын индешымше кечынже Т.Евсеев лӱмеш калыкле тоштерыште "Йыргешке пӱкен" черетан погынымаш эртен. Ты гана ӱдыр-рвезе-влак марий йылмым компьютер технологийыште кучылтмо нерген марий лингвист, компьютер йылмызе Андрей Чемышев дене мутланеныт. Тыгак вашлиймашке поэтесса, шке блогшым вӱдышӧ Зоя Дудина (Глушкова) толын.

Кызыт Андрей Чемышев Коми Республикыште ила да пашам ышта, а Марий тиште кечылан лӱмынак Йошкар-Олашке толын. Тудын деч "йыргешке пӱкеныш" чумыргышо-влак тӱрлӧ йодышлан вашмутым умылаш тыршышт. Мутлан, марий йылме эреак илыже манын, мом таче ыштыман? Андрейын шонымашыж почеш, жап толын шуын марий йылме дене корпусым ышташ. Тыгай корпус программист-влаклан марий йылмым компьютер технологийыште вияҥдаш чот полшен кертеш. Но чылажат кугу шийвундо дене кылдалтын. Лач ӱшаныме шуэш, илен-толын, моло калык семынак меат марий йылме корпусым ыштен кертына.

Вес йодыш: марий йылме дене самырык-влаклан ойлаш вожылман огыл, тыгодым марла яндар кутыраш тунемман.

"Йыргешке пӱкеныш толшо-влак тыгай иктешлымашке шуыч: марий сайт-влакым шукырак ышташ, социальный сетьлаште икте-весе дене марла "мутланаш", ешым чумырымеке, шке йочам изинек марла кутыраш туныкташ. Да тыгай вашлиймашымат чӱчкыдынрак эртараш кӱлеш. Тудо мыланна марий йылмым аралаш да вияҥдаш, икте-весе дене келшен, сай шонымашым илышыш шыҥдараш полшен кертеш.

Автор: Валерия Васильева.