"Мунло" ӱдыр-рвезе-влак чумыргеныт (фото)
Вход на сайт
4 декабрьыште Йошкар-Олаште "Мунло" республик кӱкшытан икымше интеллектуал марафон эртен. Тудо Марий Эл Республикын шочмо кечыжлан пӧлеклалтын. Тушто тӱрлӧ район ден оласе школла да кок кугу тунемме вер гыч куд еҥан кандаш команде шке шинчымашыжым шочмо мландын историйжым, чапланыше еҥже-влакым, калыкын йӱлажым палымаште терген.
Интеллектуал марафон кум тур гыч шоген. Кажне турышто 15 йодышлан чын вашмутым пуаш кӱлын. Чылаже 45 баллым погаш лийын. Икымше верыш 28,5 балл дене Марий кугыжаныш университетын "Чимарий" командыже лектын. Кокымшо верым 23,5 балл дене Йошкар-Оласе 14-ше №-ан гимназийын "ВийАр" командыже сулен гын, кумшо верым 21,5 балл дене - У Торъял районысо "Шонанпыл". Нунылан кубокым да пӧлек-влакым кучыктеныт.
Тыгак таҥасымаште лийыныт: Волжск район Сотнур кыдалаш школын "Сото нур", Морко район Коркатово лицейын "Морко памаш", Шернур район Марисола кыдалаш школын "Мустафан луйжо-влак", Советский район Ӱшнӱр кыдалаш школын "Тулгӱ" да И.С.Палантай лӱмеш республикысе тӱвыра да сымыктыш колледжын "Тӱвыр" командышт. Ӱдыр-рвезе-влаклан, нуным ямдылыше-шамычлан да марафоным эртараш полшышо еҥ-влаклан книга, календарь пӧлекым да сертификат ден Республикысе марий тӱвыра рӱдерын Таумутшым кучыктымо. Мероприятий деч ончыч командын кажне еҥжылан, ушыжо сайын пашам ыштыже манын, шоколадым пуымо.
"Мунло" марафон годым апелляционный комиссий пашам ыштен: Марий Эл Республикысе тӱвыран сулло пашаеҥже, филологий науко кандидат Зоя Иванова, марий поэтессе, "Кугарня" газетын пашаеҥже Татьяна Иванова (Пчёлкина), Т.Евсеев лӱмеш калыкле тоштерыште этнографий пӧлкам вуйлатыше, историй науко кандидат Дмитрий Байдемиров. Кузе палемдыш Иванова, ӱдыр-рвезе-влаклан шочмо йылмым, сылнымутым, калыкнан эртыме корныжым, йӱлажым палаш утларак тыршыман. Вет айдеме "вождымо" лийын огеш керт.
Ушым пудыратыме паша коклаште каналташат жапым мумо. Олык Ипай лӱмеш премийын лауреатше, эстраде мурызо Роза Искакова, самырык мурызо Марина Садова да "Изи памаш" ансамбль куандареныт.
Посна тау мутым каласыме шуэш: "ОНА" ООО-лан (вуйлатыше Нина Орман), "Билайн" компанийлан ("ВымпелКом" ОАО-н Йошкар-Оласе филиалже) пӧлек-влакым ойырымыштлан, студент-шамычлан пашам виктараш полшымыштлан, Светлана Архипова ден Григорий Кузьминлан программым вӱдаш полшымыштлан. Тыгак кугу тау Марий Эл ТВ-лан, "Марий Эл" ден "Кугарня" газет-влаклан, "Арслан" этнокультур интернет-журналлан, Марий радиолан, Марий Эл радиолан уверым шаркалаш полшымыштлан.
"Мунло" республикысе интеллектуал марафонын тӱҥ организаторжо: Республикысе марий тӱвыра рӱдер. У шонымашым илышыш шыҥдараш республикысе Тӱвыра, печать да калык-влакын пашашт шотышто министерстве, Туныктыш да шанче министерстве, Марий кугыжаныш университет полшеныт.
Автор: Эльвира Куклина.
