Шулдыр Васлий: илышыже да творчествыже

Вход на сайт

17 майыште Морко район Арын ялыште Марий Эл тӱвыран сулло пашаеҥже, писатель Шулдыр Васлийым (Василий Крылов) шарныме «пайрем» эрта. Тиде вашлиймаш сылнымут мастарын шочмыжлан 60 ий теммылан пӧлеклалтын. Ила ыле гын, 4 майыште ты лӱмгечым пайремла ыле, но 2010 ий 4 августышто ӱмыржӧ кӱрылтын.

Krilov_vasili.jpg

Лӱмгечыж вашеш Республикысе тӱвыра, печать да калык-влакын пашашт шотышто министерствын программыж почеш «У пӧрт» книгажым савыктыме.

Шулдыр Васлий йоча-влаклан возышо уста поэт семын палыме. У книгажым эше илымыж годымак лукташ ямдылен улмаш… «Тыште изи ӱдыр-рвезе-влакын койыш-шоктышышт, тыгак школысо да мӧҥгысӧ илышышт, мыскара кумыл, йылме да шонымо ойыртем, оҥай ойсавыртыш вучыдымо сӱрет гоч почылтыт».

krylov-kniga.jpg

Шкеже Василий Крылов Морко район Арыныште 1953 ий 4 майыште шочын, тӱҥалтыш шинчымашым шке ялысе кыдалаш школышто налын. А 1970 ийыште просветительский училищыш тунемаш пурен. Тушечынак армий радамыш каяшыже логалын. Пӧртылмекыже, 1973 ийыште Василий Васильевич Марий кугыжаныш университетын историй-филологий факультетшын студентше лийын. Дипломым налмеке, 13 ий Марий радиошто тыршен. А 1991 гыч 1997 ий марте «Ямде лий» йоча журнал редакцийыште тӱҥ редактор пашам шуктен. Вара Россий писатель ушемын марий пӧлкажым вуйлатыше да «Марий журналын» директорже лийын.

Йоча пагытыштыже спорт дене кылым кучен, музык да литератур деке шӱман лийын. Школышто тунеммыж годым «Колхозная правда» газет пеленсе «Морко памаш» литератур кружокыш коштын. Тиде газетын лаштыкыштыже Василий Васильевичын «Пӧртышкем» икымше почеламутшым 1966 ийыште савыктеныт. Тылеч вара«Ямде лий!» газетын юнкоржо лийын. А студент пагытыште Семен Николаевын вуйлатымыже почеш «У памаш» литератур ушем пашам ыштен. Тушто тудо староста лийын. 1974 ий гыч «Литератур шыже» семинарышке коштын. «Поҥго йӱр» икымше почеламут сборникше 1985 ийыште савыкталтын. Ятыр почеламутшылан семым келыштарыме, тыге Василий Крыловын возымо "Роза-Розмари", "Эре коктын", "Лач пырляште весела" ик эн йӧратыме мурыш савырненыт.

Произведенийже-влак:
1. Поҥго йур: почеламут-влак [Грибной дождик: стихи]. Йошкар-Ола, 1985.16 с.
2. Вÿдшÿдыр: ойлымаш-влак [Звезды в воде: рассказы]. Йошкар-Ола, 1989.48 с.
3. Mepaҥ шовыч: почеламут-влак [Зайчихин платок: стихи]. Йошкар-Ола, 1991.32с.
4. Ондри шыргыжеш: повесть//Эрвий. Йошкар-Ола, 1993. С. 3—28.
5. Сескем : хрестоматий [Искра] / сост. В.Крылов. Йошкар-Ола, 1994.152 с.
6. Поро кече : инсценировко, сценарий, сценке, такмак, пьесе-влак. Добрый день : инсенировки, сценарии, сценки, частушки, пьесы]. Йошкар-Ола, 1995. 176 с.
7. Изеҥер: почеламут-влак. [Ручеек: стихи]. Йошкар-Ола, 1995.24 с.
8. Математика чондай : занимат. материал [Математическая шкатулка]. Йошкар-Ола, 1997.112 с.
9. Пайрем устелтöрыштö : чаркамут-влак [За праздничным столом : тосты]. Йошкар-Ола, 2000. 80 с.
10. Ой , книга, книга...: сценарий-влак [Ой ты, книга, книга...: сценарии]. Йошкар-Ола, 2003.56 с.
11. Лудшаш книга [Книга для чтения для 4 кл.] / Авт. П.Емельянов, В.Крылов. Йошкар-Ола, 2003. 200 с.
12. «Эке-моке» манам да...: кайдарчык да койдарчык такмак-токмак орлаҥге [Сатир, и юморист, частушки]. Йошкар-Ола, 2005. 24 с.
13. Лач пырляште весела: почеламут, муро-вл. [Вместе веселей: стихи, песни]. Йошкар-Ола, 2006. 128с.
14. Кӧн кидыште бинокль?: пьсе-вл. [В чьих руках бинокль: пьесы]. Йошкар-Ола, 2006. 88с.
15. Шинчам пӱалын: мыскара аршаш [Строя глазки: юморески]. Йошкар-Ола, 2006. 28с.
16. Кувырдик-йывылдик: мыскара почеламут-вл. [Всё наоборот: юмор, стихи]. Йошкар-Ола, 2007. 72с.
17. Тӱс аршаш: почеламут-вл. [Радуга цветов: стихи]. Йошкар-Ола, 2008. 12с.
18. Ший йӱкан гармонет (Йоча-влаклан повесть-влак. Йошкар-Ола, 2011.
19. У пӧрт: тӱҥалтыш класслаште тунемше-влаклан почеламут-вл. [Новый дом: Стихи для младшего школьного возраста]. Йошкар-Ола, 2013. 80с.

"Писатели Марий Эл" библиографический справочниклан (2008) эҥертыме.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.