Провой кундемысе "Юлвий" ӱдырамаш клуб республикысе "Саскавий" марий ӱдырамаш ушемым унала ӱжын. 16 майыште Звенигово район Марий-Одарыште "Саскавий" вуйверын еҥже, марий амалкалче, тӱрлызӧ Ираида Степанован "Кӱсото - Святая роща" книга презентацийже эртен.

Тыгай сылне шошо кечын мутланымашке Марий-Одар клуб пеленсе "Одарушка", Юлял гыч "Шӧртньӧ пагыт" ӱдырамаш клуб-влак, Эсмекпляк ден Олыктӱр велысе "Олыксем" ансамбль ушненыт. Каласыман: "Шӧртньӧ пагыт" библиотеке пелен верланен, да тудо ӱдырамаш клуб да ансамбль семын палыме. А "Одарушка" клубыш коштшо-влак кидмастар пашашт дене чапланат.

Вашлиймаш годым Марий юмыйӱла нерген ойленыт. Ты шотышто шуко сай ойым Ираида Степанова каласен. "Саскавийын" пытартыш жапыште ыштыме пашаж дене республикысе ӱдырамаш ушемым вуйлатыше, тӱвыра, печать да калык-влак паша шотышто министрын алмаштышыже Галина Ширяева каласкален.

Организатор могырым "Юлвий" ӱдырамаш клубым вуйлатыше Ольга Майкова, Мер Каҥашын еҥже Нина Зорина ойленыт.

Пайремым Марий Элын калык артисткыже Зоя Берникова сӧрастарен. Тыгак чылаштым У Торъял землячествым вуйлатыше Виктор Наумов саламлен.

Вашлиймаш "Саскавийын" йӱлаж дене иктешлалтын: йыр шогалын, икте-весылан эҥертен, "Авамлан" мурым йоҥгалтареныт - ваш-ваш у вий-куатым налыныт.