24 октябрьыште И.С.Палантай лӱмеш республикысе марий сымыктыш да тӱвыра колледжыште родо-тукым финн-угор калык-влакын кечыштлан пӧлеклалтше «Луй модеш» оласе модыш эртыш.

Программым колледжын тунемшыже-влак Ольга Красильникова ден Наталья Охотникова вӱдышт.

Пайрем «Мундыра» вепс калык модыш дене тӱҥале, вара марий, мордва, эстон калык модыш дене шуйныш. Республикысе марий сымыктыш да тӱвыра, Йошкар-Оласе медицине да Йошкар-Оласе аграрный колледжласе студент-влак уло кумыл дене пырля модыч. «Вӱдйогын» модыш чылаштлан келшыш. Тудо студент-влакым ваш лишемдыш, ваш-ваш лишкырак палымым ыштыш.

Пайрем кумылым «Веселуха» калык семӱзгар ансамбль (вуйлатыше-влак Вера Константиновна Короткова ден Наталья Александровна Голубина) ден«Чинчывий» кӱслезе ансамбль (вуйлатыше Марина Альбертовна Эльтемерова) нӧлтышт. Кокымшо курсышто тунемше Марина Радецкая шӱмыш логалше мурым йоҥгалтарыш.

«Ой, луй модеш» оласе модыш йыр шогалын куштымо дене иктешлалте. Умбакыже келшен илаш - пырля фотографий.

Автор: Галина Петухова.
Республикысе марий тӱвыра рӱдерын сайтше - http://mari-centr.ru.