1 октябрь – Илалше-влакын тӱнямбал кечышт. Марий тӱвыра рӱдер тиде пайрем дене «шӧртньӧ ийготан-влакым» саламлыш.

Марий тӱвыра рӱдер пелен "Чоноҥгыр" фольклор ансамбль пашам ышта. Тышке 12 чолга марий ӱдырамаш коштеш. Гармонь дене Анатолий Сергеев шокта.Нуно чыланат кугу опытан да ийготыш шушо пагалыме еҥ улыт.

Рӱдерын пашаеҥже-влак ансамбльыш коштшо-влакым кӱлешан сомылым шуктен шогымыштлан тауштышт, пеҥгыде тазалыкым, пиалым да усталык сеҥымашым тыланышт. Марий тӱвыра рӱдерым вуйлатыше Валерий Григорьев чылаштлан пӧлекым кучыктыш, "Чон оҥгыр" ансамбльын марий фольклорым аралымашке да умбакыже вияҥден шогымашке кугу надырым пыштымыштым палемдыш, ончыкшымат пырля келшен пашам вораҥдарыме нерген ӱшанен каласыш.

Автор: Эльвира Куклина.