Ой-каҥаш: Кугезе тӱр - кӱчыштем

Вход на сайт

Тачысе пагытыште моло еҥ деч ойыртемалтемалташ да тыгодымак ару, сылне лияш манын, кӱчышкӧ марий тӱрымат «тӱрлаш» лиеш…

10-10-10+.jpg

Кузе ме шарнена, шукыж годым аван ныжыл кидше эреак паша дене козыраҥше лийын. Вет тудлан шуко да тӱрлӧ сынан сомылым шукташ логалын. Шкан жап кодынат огыл. Но кызыт уремыште – XXI курым; илыш йодмаш чылт вашталт толеш. Тачысе марий ӱдырамашат кеч-кушто да кеч-кунамат шкенжым кучен, ончыктен моштышаш. Ынде «тӱжвал сын дене вашлийыт» ой илышыш чотак шыҥен пурен. Тыге ме чурийвылышлан, чиемлан гына огыл, кидланат кугу тӱткышым ойырышаш улына.

Кидым самырыкнек эскерыман, а кугурак лиймеке, поснак ончыман. Палемдем, йытыран кучымо кӱч дене кид самырыкрак коеш. Сандене кӱчым йытыраяш жапым муаш тыршыманак. Лавыран пашам от ыште гын, арнялан ик гана йытырайымашат сита. А кӱч ӱмбаке сайын пыштыме шеллак, гель да тудым сӧрастараш, пеҥгыдемдаш полшышо моло средстве кум-ныл арня кучышаш.

Тидымат палаш уто огыл: ӱдырамашын шкенжын толмо пагытште кӱчым чиялтет гын, тудо шуко жаплан огеш сите, вашке каткалалт кораҥаш тӱҥалеш.

Кид моторын койжо манын, кӱчым тӱрлӧ семын сӱретлаш лиеш. Мутлан, тушко марий орнаментым сылнештарен кертына. Тидым икымше гана шкаланем ыштен онченам да марий концертыш тыге мураш лектынам ыле. Теве ынде мый декем кӱчышкӧ марий тӱрым «тӱрлаш» йодын самырык-влак толыт. Чынак, тиде моло еҥ коклаште ойыртемалташ полша, тӱжвал сыныш у шӱлышым пурта.

IMG_0914+.jpg

Кӱч таза лийже манын, шотыш налман: пӧрткӧргым эрыкташ, тувырым мушкаш кучылтмо наста-влак кидлан да кӱчлан эҥгекым ыштат. Тугеже перчаткым чияш уто огыл.

А мланде пашам шуктымо годым кузе лийман? Мланде ден айдеме коклаште кыл лийшаш, ойлат да тудым чара кид дене пургедаш тыршат. Чын, кушкылым, озымым рокыш шындыме годым мланде дене кылым ышташ лиеш, но вот пареҥге кӱнчаш да погаш адак перчаткым чиет гын, сайрак.

Ме шарнышаш улына: эн тӱҥжӧ, кид, кӱч таза да ару лийшаш.

Кызытсе пагытыште кӱчым лӱмын куштымо йӧнат уло. Но таче чот кужу кӱч модышто огыл, мӧҥгешла, илыш дене тӧр ошкылшо мотор-влак кӱчыкын пӱчмӧ кӱчым йытыраен шындаш тыршат.

Кеч-кунамат ӱдырамашлан шкан жапым муаш неле лийын, тачат еш, шуко тӱрлӧ паша - мемнан вачӱмбалне. Но ынде илыш радамышкына косметолог, кӱч технолог деке коштмашым пуртыманак. Уке гын, чыла тидым шке ышташ тунемман.

Теве ме палемдышна, кид да кӱч таза лийшаш улыт. Тыге эреак кремым, кӱч йыр, кутикул воктеке тӱрлӧ ӱйым йыгыман. Кӱчым пеҥгыдемдаш манын, йодымат шӱрат. Лимон дене маске сайын полша. Лимоным пелыгыч пӱчса да тушко парнядам шуралза – 15 минут тыге шинчыза.

Кӱчлан кальций кӱлеш, сандене тыгай витаминан кочкышым кочса, витаминжымат посна йӱза.

Мутат уке, ару да таза кид, кӱч – мотор да шонымашке шуын моштышо ӱдырамашын тачысе сынже.

Автор: Татьяна Светлакова, кӱч дизайнер.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.